ახალციხის ციხის დირექტორს ყოფილმა თანამშრომელმა სასამართლო საბოლოოდ მოუგო

ააიპ ‘ახალციხის ციხეს’, სამსახურიდან გათავისუფლებული თანამშრომლის ეკატერინე დგებუაძის დაბრუნება და წელიწადნახევრის განმავლობაში მისთვის მიყენებული ზარალის ანაზღაურება დაეკისრა.

უზენაესმა სასამართლომ „ახალციხის ციხის“ საკასაციო საჩივარი წარმოებაში არ მიიღო. ამიტომ ძალაში დარჩა ახალციხის რაიონული სასამართლოს გადაწყვეტილება, რომლის თანახმადაც ეკატერინე დგებუაძეს იძულებით განაცდური საათები უნდა აუნაზღაურონ და სამსახურშიც დააბრუნონ.

„მართლია ციხეზე დირექტორი შეიცვალა, მაგრამ დგებუაძე სამსახურში უნდა დააბრუნონ. თუ არ დააბრუნებენ და კანონიერ ძალაში შესულ გადაწყვეტილებას არ აღასრულებენ, მათი სისხლის სამართლებრივი პასუხისმგებლობის საკითხი დადგება“, – ამბობს დგებუაძის ადვოკატი ეკა აბაშიძე.

შეგახსენებთ, რომ ახალციხის ციხის ყოფილმა დირექტორმა ელგუჯა ბიჭაშვილმა ამავე ციხის თანამშრომელი ეკატერინე დგეუბუაძე სამსახურიდან 2013 წლის 6 აგვისტოს გაათავისუფლა. ბრძანებაში გათავისუფლების საფუძვლად შრომის კოდექსის 37-ე მუხლის დ ქვეპუნქტი მიუთითა, რაც დამსაქმებლის მიერ ხელშეკრულების შეწყვეტას ნიშნავდა.

[თამუნა უჩიძე, ახალციხე]