ახალციხეში სინაგოგას 150 წლის იუბილეს საზეიმოდ აღნიშნავენ

ახალციხის მუნიციპალიტეტის მერია მიმდინარე წელს ახალციხეში მდებარე უძველესი სინაგოგის 150 წლის იუბილესთვის ემზადება. როგორც ახალციხის მერი გიორგი კოპაძე აცხადებს, ჯერ თარიღი გარკვეული არაა.

„12 ივნისი საორიენტაციოდ ითქვა, თუმცა საქართველოში რაბინს ვესაუბრე და ამიხსნა, რომ ამ დღეს ებრაელების ერთ–ერთი დღესასწაულია, ამიტომ ზეიმი, ცეცხლის ანთება და სხვა ამგვარი ღონისძიებები იკრძალება, – ამბობს გიორგი კოპაძე და ამატებს, რომ 11 თებერვალს შვებულების პერიოდში ისრაელში მიემგზავრება და თარიღს საბოლოოდ შეათანხმებს, – გაირკვევა ზუსტი დრო, ასევე ის, ეს ღონისძიებები ერთდღიანი იქნება, ორდღიანი თუ სამდღიანი“.

მისი თქმით, ამ დღეს გაიმართება კონცერტი და ორი ერის მრავალწლიან მეგობრობას ებრაელები და ქართველები ერთად იზეიმებენ: „ჩვენი სინაგოგა საქართველოში ყველაზე უძველესია, მას წელს ზუსტად 153 წელი უსრულდება“.

ქალაქის მერის განცხადებით, ამ სინაგოგას გვერდით მდებარე შედარებით პატარა სინაგოგაში, რომელიც ამჟამად უმოქმედოა, ქართველი და ებრაელი ხალხის მეგობრობის მუზეუმის გახსნა იგეგმება: „ეს შენობა მერიის ბალანსზეა, შევათანხმებთ ებრაელ თემთან და როგორც გადაწყვეტენ, ისე გავაკეთებთ“.

ასევე ამ იუბილესთან დაკავშირებით, კოპაძის თქმით, მესხეთის თეატრში ქართველი და ებრაელი ხალხის მეგობრობის შესახებ სპექტაკლი დაიდგმება: „მისი ჩვენება ისრაელში მცხოვრები ქართველებისთვისაც გვინდა“.

ქალაქის მერი მიიჩნევს, რომ ამგვარი ღონისძიებები როგორც ორი ერის მეგობრობას, ასევე ახალციხეში ტურისტების მოზიდვსაც შეუწყობს ხელს.

[თამუნა უჩიძე, ახალციხე]