ახალციხეში ნათლისღების დღესასწაული აღნიშნეს

ახალციხისა და ტაო-კლარჯეთის მიტროპოლიტმა, კათოლიკოს-პატრიარქის ქორეპისკოპოსმა მეუფე თეოდორემ, საზეიმო წირვა–ლოცვა ახალციხის წმინდა მარინეს სახელობის ტაძარში აღავლინა. წირვის დასრულების შემდეგ, ახალციხის მუნიციპალიტეტის სოფელ ჭაჭარაქთან, მდინარე მტკვარზე წყლის კურთხევა გაიმართა. მდინარე მტკვარზე შესრულდა ნათლობის ცერემონიაც, მდინარეში მონათლეს ჩვილებიც.

„როგორც უფალმა განაახლა და განწმინდა წყლის ბუნება, ისე ნაკურთხი წყლით განწმენდილიყოს ი და განახლებულიყოს თითოეული ჩვენგან“, – განაცხადა მეუფე თეოდორემ.

მახარე ვარდიძემ, რომელიც განბანვის რიტუალს მინაძეში დაესწრო, აღნიშნა, რომ ამ ცერემონიას ოჯახის წევრებთან ერთად, ყოველ წელს ესწრება: „ნათლისღება ერთ–ერთი ყველაზე მნიშვნელოვანი დღესასწაულია. ვუსურვებ ყველა ქრისტიანს ღვთისწყალობას. დღევანელი დღის მადლი ფარავდეს სრულიად საქართველოს“.

ნათლისღების დღესასწაული ერთ-ერთია თორმეტ საუფლო დღესასწაულს შორის. ამ დღეს ყველა ტაძარში წყალკურთხევა აღესრულება, ანუ დიდი აიაზმა. მორწმუნეებს ნაკურთხი წყლის სახლში წაღება შეუძლიათ. სახარების თანახმად, ამ დღეს იოანე ნათლისმცემელმა მდინარე იორდანეში მონათლა იესო ქრისტე.

[თინათინ ზაზაძე, ახალციხე]