ბორჯომში ნათლისღების დღესასწაული აღნიშნეს [ფოტო]

საქართველოს მართლმადიდებლური ეკლესია 19 იანვარს ნათლისღებას აღნიშნავს. ამ დღესასწაულთან დაკავშირებით საქართველოში საზეიმო წირვა–ლოცვა ტარდება.

ბორჯომის ეპარქია 17 წელია განბანვის რიტუალს ნათლისღების წინა დღეს, 18 იანვარს ასრულებს. რიტუალის დაწყებამდე სასულიერო პირები ლოცვას აღავლენენ და წყალს აკურთებენ.

„მდინარეს ვაკურთებთ და მრევლთან ერთად წყალში ჩავდივართ, ამ დროს სიძულვილის განბანვა ხდება. მინდა სრულიად საქართველოს მივულოცო ნათლისღება უფლისა იესო ქრისტესი. ღმერთმა დაგლოცოთ მოგანიჭოთ რწმენა, სიყვარული, თავმდაბლობა“,-ამბობს ბორჯომის დავით აღმაშენებლის სახელობის ეკლესიის წინამძღვარი, დეკანოზი არჩილი.

მისი თქმით, ტრადიციას საფუძველი ბორჯომში 17 წლის წინ, მეუფე სერაფიმეს კურთხევით ჩაეყარა.

„წელს მეორედ შევდივარ წყალში და ასე ავღნიშნავ ამ დღესასწაულს, ვულოცავ ყველას და გისურვებთ ღვთისწყალობას“,-ამბობს ბორჯომში მცხოვრები ანი კლინიკოვა.

მრევლის ნაწილი, კი ბორჯომში განბანვის რიტუალში დაწყების დღიდან მონაწილეობს.

„მე და ჩემი ოჯახის წევრები მეუფე სრაფიმეს მრევლი ვიყავით და იმ დღიდან, როცა დაიწყო ეს ტრადიცია ყოველ წელს ვიღებთ მონაწილეობას. გილოცავთ და ღვთისწყალბა არ მოგკლებოდეთ“,-ამბობს ბორჯომის ეპარქიის მრევლი გულიკო გვიმრაძე.

ნათლისღება ერთ-ერთი უმთავრესი ქრისტიანული დღესასწაულია. სახარების თანახმად, ამ დღეს იოანე ნათლსიმცემელმა მდინარე იორდანეში მონათლა იესო ქრისტე.

ნათლისღების დღესასწაულზე და მის წინა დღეს ყველა მართლმადიდებლურ ტაძარში სრულდება წყალკურთხევა და ნაკურთხი წყალი ურიგდებათ მორწმუნეებს.

ამ წყალს უფლის მიერ კურთხეული იორდანის მადლი ეძლევა და, ჩვეულებრივი წყლისგან განსხვავებით, არ იხრწნება. ის შეგიძლიათ მთელი წლის განმავლობაში შეინახოთ და განსაცდელისა და ავადმყოფობის დროს მიიღოთ.









[ნუკა სტეფნაძე, ბორჯომი]