უნივერსიტეტში სწავლა დაიწყო

"გილოცავთ ახალ სასწავლო წელს”, - უნივერსიტეტის მთავარი კორპუსის კედელზე გაკეთებული ამ წარწერითა და საზეიმოდ მორთული ეზოთი დახვდა სასწავლებელი დღეს დილით სტუდენტებს.

საზეიმო ღონისძიება საქართველოს ჰიმნის ფონზე უნივერსიტეტის ეზოში დროშის აღმართვით დაიწყო.

უნივერსიტეტის რექტორმა თინა გელაშვილმა სტუდენტებს სასწავლო წლის დაწყება მიულოცა და უნივერსიტეტში დანერგილ სიახლეებზე ისაუბრა.

საზეიმო ღონისძიებას ესწრებოდა ”ერთიანი ნაციონალური მოძრაობის” მაჟორიტარი კანდიდატი ახალციხის მუნიციპალიტეტში ვაჟა ჩიტაშვილიც, რომელიც სამართალმცოდნეობის ფაკულტეტზე ლექციებს კითხულობდა. უნივერსიტეტის რექტორმა იგი საპატიო სტუმრის სტატუსით წარადგინა.

ასევე საპატიო სტუმრის სტატუსით ესწრებოდა გახსნის ცერემონიას ადმინისტრაციული სამსახურის ყოფილი უფროსი ნოდარ გოროხოვი, რომელიც ამჟამად ახალციხის ციხის დირექტორია. მან სტუდენტებს სწავლის დაწყება მიულოცა და ციხის სანახავად მიიპატიჟა. ნოდარ გოროხოვი ახალციხის უნივერსიტეტში ხუთი წლის განმავლობაში მუშაობდა. თინა გელაშვილის განცხადებით, მას დიდი წვლილი მიუძღვის უნივერსიტეტის მატერიალურ-ტექნიკური ბაზის განახლებაში.

ადმინისტრაციული სამსახურის უფროსის პოსტზე ნოდარ გოროხოვი ახალციხის მუნიციპალიტეტის გამგებლის ყოფილმა მოადგილემ ბიძინა მაისურაძემ შეცვალა.

საზეიმო ღონისძიებაზე სტუდენტებს ახალციხის მეექვსე საჯარო სკოლის დირექტორმა ზაზა თამარაშვილმაც მიმართა. მეექვსე სკოლასა და უნივერსიტეტს შორის გაფორმებული მემორანდუმის თანახმად, უნივერსიტეტის სტუდენტები პრაქტიკას ამ სკოლაში გაივლიან. სწორედ ამ მემორანდუმის ფარგლებში, უნივერსიტეტის ფინანსური მხარდაჭერით, მეექვსე სკოლას რეაბილიტაცია ჩაუტარდა

უნივერსიტეტის ეზოში შეკრებილი სტუდენტები, ახალციხისა და ტაო-კლარჯეთის მიტროპოლიტმა მეუფე თეოდორემ დალოცა. დღესვე სიგელებითა და სამეცნიერო ლიტერატურით დაჯილდოვდა საუკეთესო აკადემიური მოსწრების მქონე 12 სტუდენტიც.

მისალმების შემდეგ უნივერსიტეტის ეზო ადგილობრივი ფოლკლორული ანსამბლებისა და უნივერსიტეტის ანსამბლის კონცერტს დაეთმო.

[ნინო ნარიმანიშვილი, ახალციხე]