გამგებლის პასუხები მოსახლეობას

ეხება თუ არა გზების დაგება მუნიციპალიტეტს? როდის დაიწყება სოფლების გზების რეაბილიტაცია? რა თანხაა გამოყოფილი სტიქიით დაზარალებულთა დასახმარებლად? ვინ ხელმძღვანელობს მრავალბინიანი საცხოვრებელი სახლების სახურავების შეცვლას? როდის შევიდა ბოლო ცვლილება ადგილობრივ ბიუჯეტში? რამდენი ოჯახია მუნიციპალიტეტის მასშტაბით, რომელთაც სესხების რესტრუქტურიზაცია ესაჭიროებათ - ამ და სხვა კითხვებს მუნიციპალიტეტის გამგებელი ონლაინ-რეჟიმში, ერთი საათის განმავლობაში პასუხობდა.

მიუხედავად იმისა, რომ კონფერენცია რამდენიმე დღით ადრე, აქტიურად ანონსდებოდა, მოქალაქეები მაინც პასიურობდნენ.

ირინა გელაშვილის კითხვაზე, რამდენად ეხება გზების დაგება მუნიციპალიტეტს? რა იგულისხმება შიდა გზებში? ეკუთვნის თუ არა რაბათის ზევით მოსახლება და სოფლები მუნიციპალიტეტს? გამგებელმა განაცხადა, რომ ”შიდა გზების რეაბილიტაცია, მოვლა-შენახვა მუნიციპალიტეტის პრეროგატივაა. რაბათის ზევით მოსახლებოაც და სოფლებიც ეკუთვნის მუნიციპალიტეტს და გზებს რეაბილიტაცია ეტაპობრვად უტარდება”.

რაც შეეხება სტიქიის თემას, გამგებლის განცხადებით, სტიქიის შედეგების ლიკვიდაციისათვის ცენტრალური ბიუჯეტიდან დაახლოებით 2,000,000 ლარია გამოყოფილი. კითხვა, კონკრეტულად რაზე გაიწერება აღნიშნული თანხა, უპასუხოდ დარჩა. თუმცა გაირკვა, რომ ამ თანხაში შედის სახურავების რეაბილიტაციაც.

მისივე განცხადებით, ახალციხის მუნიციპალიტეტში დაახლოებით 135 მრავალბინიანი საცხოვრებელი კორპუსის რეაბილიტაციაა დაგეგმილი. 52 კორპუსი ვალეში, დანარჩენი კი ახალციხეში მდებარობს. 69 კორპუსზე მუშაობა ამჟამად მიმდინარეობს, 32 კორპუსის სახურავი კი უკვე შეცვლილია.

კითხვები, როდის შევიდა ბოლო ცვლილება ადგილობრივ ბიუჯეტში? რამდენი ოჯახია მუნიციპალიტეტის მასშტაბით, რომელთაც სესხების რესტრუქტურიზაცია ესაჭიროებათ - უპასუხოდ დარჩა.

[თამარ თოთაძე, ნინო ნარიმანიშვილი, ახალციხე]