დიდთოვლობის გამო ნინოწმინდაში 54 წლის მამაკაცი გაიყინა

მამაკაცის გარდაცვალების შესახებ ინფორმაციას ჯავახეთში მომუშავე საინფორმაციო სააგენტო Jnews.ge ავრცელებს. სააგენტოს ინფორმაციით, თოვლში მოყოლილი მამაკაცი ჯერ მანქანაში იცდიდა, შემდეგ კი მანქანა მიატოვა და ფეხით სცადა სოფელ სპასოვკამდე მიეღწია. იგი ღამით, სოფელთან ახლოს, გარდაცვლილი ნახეს.

შეგახსენებთ, საქართველო– სომხეთის დამაკავშირებელ მაგისტრალზე, ნინოწმინდის მუნიციპალიტეტში დიდთოვლობა და ქარბუქი 5 იანვრიდან დაიწყო. გზაზე თოვლში ასობით მანქანა მოჰყვა. გზის გაწმენდის სამუშაოები 5 იანვრიდან დაიწყო. ამ დღეს სამუშაოებს თოვლი და ძლიერი ქარბუქი აფერხებდა. 6 იანვარს სამართალდამცველებმა და სამაშველო სამსახურებმა შეძლეს თოვლში მოყოლილი 300–მდე ადამიანის გადაყვანა უსაფრთხო ადგილზე.

ამ დროისთვის ნინოწმინდაში გზის გაწმენდვის სამუშაოების 70 პროცენტი დასრულებულია. ადგილზე მობილიზებულია შსს სამცხე–ჯავახეთის სამხარეო სამმართველოს ახალქალაქისა და ნინოწმინდის რაიონული სამმართველოები. გარდა ამისა, რთული ვითარების გამო, ნინოწმინდის სახანძრო-სამაშველო სამსახურის სამაშველო ჯგუფების გარდა, ნინოწმინდაში მობილიზებულია სამცხე-ჯავახეთის რეგიონული სამაშველო ჯგუფები, თბილისიდან კი დამატებით გაიგზავნა ხუთი ჯგუფი სპეციალური მაღალი გამავლობის ავტომანქანებით.

შსს–ს ინფორმაციით, შსს-ს საგანგებო სიტუაციების მართვის დეპარტამენტის კოორდინაციით ჩატარებული სამაშველო ოპერაციის შედეგად მაშველებმა 100-მდე ავტომანქანა გამოიყვანეს თოვლიდან და გადაიყვანეს უსაფრთხო ადგილას.

სამაშველო ჯგუფები ამ დრომდე აგრძელებენ მუშაობას.






მასალაში გამოყენებულია სააგენტო Jnews.ge-ს ფოტოები

[ნინო ნარიმანიშვილი, ახალციხე]