ახალციხეში პოლიტიკურმა პარტიებმა ტაიმაუტი აიღეს

ახალციხის მუნიციპალიტეტში არჩევნებამდე ცოტახნით ადრე კოალიცია „ქართული ოცნებისა“ და „დემოკრატიული მოძრაობა - ერთიანი საქართველოს“ საარჩევნო შტაბები გაიხსნა. მანამდე ფუნქციონირებდა „ერთიანი ნაციონალური მოძრაობის“ ოფისი.

ამ დროისთვის საარჩევნო შტაბები ცარიელია, რადგან არჩევნების დასრულებასთან ერთად დასრულდა სამუშაოც. თუმცა, მომავალი ადგილობრივი არჩევნებისთვის მზადებას სამივე პოლიტიკური ორგანიზაცია აქტიურად აპირებს.

ამიტომ „დემოკრატიული მოძრაობა - ერთიანი საქართველოს“ შტაბი, რომელიც ნათენაძის N9-ში მდებარეობს, არ დაკეტილა და ფუნქციონირებას თვითმმართველობის არჩევნების მოლოდინში კვლავ აგრძელებს.

„რეგიონის მასშტაბით შტაბები დავკეტეთ ყველა მუნიციპალიტეტში, მაგრამ ახალციხეში რეგიონული ოფისი მაინც დავტოვეთ“, - ამბობს „ნინო ბურჯანაძე - დემოკრატიული საქართველოს“ რეგიონის შტაბების კოორდინატორი ჯიმშერ გოგოლაური.

მიუხედავად იმისა, რომ ოფისი ფუნქციონირებას ჩვეულებრივ აგრძელებს, არჩევნების დასრულების შემდეგ „ნინო ბურჯანაძე - დემოკრატიული საქართველოს“ ახალციხის შტაბის უფროსმა გაგა ივანიძემ პარტია დატოვა. იგი მიზეზად პირად საქმეებს ასახელებს: „აღარ ვარ მანდ, ბევრი პირადი საქმე მაქვს“.

ფუნქციონირება არც კოსტავას ქუჩაზე მდებარე „ერთიანი ნაციონალური მოძრაობის“ ახალციხის ოფისს შეუწყვეტია.

„შტაბის დახურვას არ ვაპირებთ. როცა ადგილობრივი თვითმმართველობის არჩევნები მოახლოვდება, სათანდოდ მოვემზადებით“, - აცხადებს „ერთიანი ნაციონალური მოძრაობის“ ახალციხის რაიონული ორგანიზაციის ხელმძღვანელი გელა დემეტრაძე.

ოპოზიციური პარტიებისგან გასნხვავებით, დახურულია მმართველი კოალიციის ახალციხის რაიონული შტაბი, რომელიც რუსთაველის ქუჩაზე მდებარეობს. თუ რა ფორმით გააგრძელებს კოალიცია და ან პარტია „ქართული ოცნება - დემოკრატიული საქართველო“, ფუნქციონირებას ჯერ ცნობილი არ არის.

„ყველაფერი პარტიის დამფუძნებელი ყრილობის შემდეგ გაირკვევა. როგორც ვიცი მთლიანად იცვლება პარტიის სტრუქტურა და ის სამდივნოებად იქნება წარმოდგენილი“, - ამბობს კოალიცია „ქართული ოცნების“ ახალციხის შტაბის ხელმძღვანელი მალხაზ ჟუჟუნაძე და ამატებს, რომ საორგანიზაციო საკითხები და ის, შენობაში სადაც კოალიციის შტაბი იყო დარჩება თუ არა მომავალში უკვე პარტია „ქართული ოცნება“, ჯერ უცნობია.

[თამუნა უჩიძე, ახალციხე]