„დემოკრატიული მოძრაობა“ სამცხე–ჯავახეთში ხელმოწერებს შეაგროვებს

"უბლოკო სტატუსი ნიშნავს, ნებისმიერ სამხედრო ორგანიზაციაში გაწევრიანებაზე უარის თქმას“ – აცხადებს გაერთიანებული დემოკრატიული მოძრაობის ლიდერი ნინო ბურჯანაძე. სწორედ ამ მიზნით, პარტია ქვეყნის მასშტაბით ხელმოწერების შეგროვებას იწყებს.

„გაერთიანებული დემოკრატიული მოძრაობის“ ახალციხის ორგანიზაციაში ამბობენ, რომ თბილისიდან სპეციალურ ბლანკებს ელოდებიან, რის შემდეგაც ხელმოწერების შეგროვებას სამცხე-ჯავახეთის მასშტაბით დაიწყებენ.

„პარლამენტმა შეგნებულად გააკეთა, ხან ქვორუმი არ იყო და ხან რა, რომ ამ საკითხზე არ ემსჯელათ, ამიტომ იძულებულები ვართ ხელმოწერების შეგროვება დავიწყოთ “ - ამბობს, პარტიის დეპუტატობის კანდიდატი ბესიკ ხითარიშვილი.

პარტიის წევრების განცხადებით, არ სურთ საქართველოს ტერიტორიაზე ნატოსა და რუსეთის ჯარები იყოს განლაგებული.
„უბლოკო სტატუსი არ არის ნეიტრალიტეტი, უბლოკო სტატუსი არის ის, რომ საქართველოს მხოლოდ ჩვენი ქვეყნის ჯარი იცავდეს“ - ამბობს ბესიკ ხითარიშვილი.

ხელმოწერების შეგროვების შემდეგ, პარტიის წევრები მათ წარდგენას პარლამენტში აპირებენ.

[ლუბა გიორგაძე, ახალციხე]