დასრულებული და დაწუნებული პროექტები ახალციხეში

9 აპრილის ქუჩაზე, ეზოებში ასფალტს შპს „არალი“ აგებდა. სამუშაოებისთვის 250.000 ლარი გამოყო. ახალციხის მერიაში განმარტავენ, რომ ამ ეტაპზე მიღება–ჩაბარების ოქმი ფორმდება.

მოასფალტების სამუშაოები დასრულდა გვარამაძისა და ასპინძის ქუჩებზეც.

გვარამაძის ქუჩაზე, 173.000 ლარით, სამუშაოები შპს „მესხეთი ავტოგზამ“ შეასრულა. ასპინძის ქუჩის მიმდებარე ტერიტორიები კი 154.000 ლარით შპს „ოცხემ“ მოაასფალტა.

შპს „კენტავრი და კომპანია“ ასრულებდა სამუშაოებს თამარაშვილის, ვარძიისა და მთაწმინდელის ქუჩებზე. ვარძიის ჩიხის მოასფალტებისთვის 95.600 ლარი დაიხარჯა, თამარაშვილისა და მთაწმინდელის ქუჩებისთვის – 244.400 ლარი. თუმცა, სამუშაოები მხოლოდ ორ ქუჩაზე დასრულდა. დამკვეთმა მთაწმინდელის ქუჩაზე შესრულებული სამუშაოები დაიწუნა.

„აღნიშნული პროექტი მსოფლიო ბანკის დაფინანსებულია. ჩამოვიდნენ წარმომადგენლები და არ მოეწონათ. ხელახლა ამოთხარეს და ახალად აკეთებენ, წყალკანალის თანამშრომლები მუშაობენ მთაწმინდელის ქუჩაზე. ისეა გადათხრილი, წელს ვერ დავაგებთ ასფალტს, გაზაფხულისთვის გადაიდება“, – ამბობს ახალციხის მერიის ურბანული მოწყობის და საქალაქო მეურნეობის სამსახურის უფროსი გელვასი გელაძე.

მიმდინარე კვირაში სამუშაოებს მუნიციპალური განვითარების ფონდის წარმომადგენლებიც აკვირდებოდნენ. მათი განმარტებით, პროექტში ცვლილებები დასაბუთებული მიზეზების გამო მოხდა და მშენებელი კომპანია სავარაუდოდ არ დაჯარიმდება.

„ვერ ვიტყვი, რომ არასრულყოფილი იყო პროექტი, მაგრამ წყლის კომპანიასთან ერთად ხდება ცვლილება და ეს აყოვნებს კონკტრაქტორს“, – ამბობს მუნიციპალური განვითარების ფონდის ფონდის წარმომადგენელი ავთანდილ ჯაყელი.

შპს „კენტავრი და კომპანია“ სამუშაოებს რუსთაველის ქუჩაზე, მესამე საჯარო სკოლის მიმდებარე ტერიტორიაზეც ასრულებდა. კომპანიამ სამუშაოები დათქმულ ვადაში ვერ დაასრულა, რის გამოც 1.100 ლარით დაჯარიმდება.

„სანიაღვრე არხები გააკეთა, მაგრამ ცხაურების დარჩათ გასაკეთებელი, რამდენიმე დღეში დაამთავრეს. მაგრამ გადაცილებული დღეების გამო მაინც დაჯარიმდება“, – ამბობს გელვასი გელაძე.

[თინათინ ზაზაძე, ახალციხე]