ახალციხე ქალთა მიმართ ძალადობის კამაპანიას შეუერთდა

„ნუ გაამართლებ ძალადობას!“ „პოლიციამ უნდა დაიცვას ქალები ძალადობისაგან!“ „ჩვენ შეგვიძლია ერთად შევაჩერთო ძალადობა“, „ოჯახში ძალადობა არ არის მხოლოდ ოჯახის საქმე“ „საქართველოში ყოველ მე-11 ქალს სცემენ“, - ამ ტრანსპარანტებით დღეს, 25 ნოემბერს, ახალციხის ცენტრალურ პარკში არასამთავრობო ორგანიზაციების, ადგილობრივი მედია–საშულებებისა და ქალაქის მერიის წარმომადგენლები შეიკრიბნენ.

„დღეს, 16-დღიანი კამპანია იწყება, სახელწოდებით - „ქალებს საქართველოში კლავენ, შევაჩეროთ!“ ცხრა თვეში საკთარ ოჯახში 24 ქალი მოკლეს, ფემიციდი სახეზეა, ამიტომ საზოგადოება და სამართალდამცავი ორგანოები ერთად უნდა დავირაზმოთ და ვებრძოლოთ ძალადობას“, - მიმართა შეკრებილებს „სამცხე-ჯავახეთის დემოკრატ ქალთა საზოგადოების“ თავმჯდომარემ მარინა მოდებაძემ.

მან აქციის მონაწილეებს ქალთა ორგანიზაციების მიერ შემუშავებული პეტიცია გააცნო, რომელიც ქალთა მიმართ ძალადობის აღმოსაფხვრელად შეიქმნა. მისი საშუალებით საზოგადოება ხელისუფლებას მოუწოდებს, გააცნობიეროს ქალთა ძალადობის პრობლემის სიმწვავე და ეფექტური პოლიტიკა გაატაროს. პეტიციას ხელი აქციის თითქმის ყველა მონაწილემ მოაწერა.

„კანონიც არ გვაძლევს საშუალებას, რომ ქალები ძალადობისდგან დავიცვათ და ქვეყანში მძიმე სოციალური ფონიცაა. მიხარია, რომ დღეს ამ აქციაზე ბევრი ახალგაზრდა დგას და რომ ძალადობის ავანგარდები ახალგაზრდები გამოდიან“, - ამბობს ასოციაცია „ტოლერანტის“ ხელმძღვანელი ცირა მესხიშვილი.

ხელისუფლება რომ უნდა გააქტიურდეს ქალზე ძალადობის წინააღდეგ საბრძოლველად, ამაზე საუბრობს სამოქალაქო ინიციატივების ასოციაციის პროექტების მენეჯერი თამუნა კაპანაძეც: „ხალხი რომ ქუჩებში გამოვიდა და ძალადობაზე ლაპარაკი დაიწყო, ეს უკვე შეცვლის რაღაცას. თუმცა, საბოლოოდ, გარკვეული ზომები მაინც სახელმწიფომ უნდა გაატაროს“.



აქციას ქალები ასპინძის მუნიცპალიტეტის სოფელ ტოლოშიდანაც შეუერთდნენ.

„იმედია ხალხი გაიღვიძებს და ყველა ერთად გავერთინადებით ამის წინააღდეგ საბრძოლველად“, - ამბობს ტოლოშის მკვდირი ეკატერინე ზუბაშვილი.

მეზობელს ეთანხმება ნინო ბერიძეც: „ქალები უნდა დავუდგეთ ერთმანეთს გვერდით და სოლიდარობა გამოვუცხადოთ მათ, ვისზეც ძალადობენ“.
„დემოკრატ ქალთა საზოგადოების ქალთა კლუბის ხელმძღვანელი“ მანანა მოდებაძე ფიქრობს, რომ ის ვინც დღეს კარის გამოღება და აქციაზე მისვლა ვერ შეძლო, თუმცა მასზე არა ერთხელ უძალადიათ, დღევანდელი აქციით საზოგადოების გვერდში დგომას იგრძნობს, რაც ძალიან მნიშვნელოვანია.

ქალის მკვლელობის 24 ფაქტიდან სამცხე-ჯავახეთში არცერთი არ დაფიქსირებულა. თუმცა როგორც მარინა მოდებაძე აცხადებს, ძალადობის მსხვერპლი ქალები რეგიონშიც ძალიან ბევრია: „ადრე თქმას ვერ ბედავდნენ, ახლა უფრო საუბრობენ ამაზე და ვფიქრობ სწორედ ამის ხარჯზე, ბოლო დროს, ქალზე ძალადობის სტატისტიკური მაჩვენებელი სამცხე-ჯავახეთშიც გაიზარდა“.





[თამუნა უჩიძე, ახალციხე]