მუსლიმები: გუბერნატორთან არაფერზე შევთანხმებულვართ

„არაფერზე შევთანხმებულვართ, ეს ცრუ ინფორმაციაა. თუ შეთანხმებას მივაღწიეთ ჩვენი მუფთი რატომ არის წასული პრემიერთან შესახვედრად? ჯამეში რეზიდენციის მოწყობა ჩვენ არ გვაინტერესებს. ხელისუფლება დაგვპირდა შენობის გადმოცემას და მოგვატყუა“, – ამბობს ვახტანგ მარკოიძე, რომელიც 20 ოქტომბერს ადიგენის თვითმმართველობის შენობაში გამართულ შეხვედრას ესწრებოდა.

აქციის მონაწილეები აცხადებენ, რომ შენობა, რომელშიც ამ დრომდე ლოცულობენ მათი საკუთრება არ არის.

„ვითხოვთ სადავო შენობა მოგვცენ და ჩაბარდეს მუსლიმთა სამუფთოს. ჯამე, რომელიც მოქმედია, საცხივრებელი სახლია და ნაქირავები გვაქვს“, – ამბობს აქციის მონაწილე თამაზ ბერიძე.

შეგახსენებთ, რომ დღეს, 23 ოქტომბერს, სამცხე–ჯავახეთის გუბერნატორმა აკაკი მაჭუტაძემ მოხეში განვითარებული მოვლენების გამო სპეციალური ბრიფინგი გამართა და განაცხადა, რომ მუსლიმ მრევლთან შეთანხმდა და სადაო შენობაში ბიბლიოთეკა განთავსდება. სანაცვლოდ, ჯამეში სახელმწიფო ხარჯებით სამუფთო რეზიდენციის მოწყობა შესთავაზა და ამ თემაზე მუსლიმებისგან პასუხს ამ დრომდე ელოდება.

[თამუნა უჩიძე, თინათინ ზაზაძე, ახალციხე]