თინათინ მღვდლიაშვილის პოეზიის საღამო ახალციხეში

ბიბლიოთეკაში შეკრებილი აუდიტორიისთვის თავის შემოქმედებიდან პოეტი 2 საათის განმავლობაში კითხულობდა ლექსებს. შესრულდა მის ლექსებზე შექმნილი სიმღერებიც.

"მშვენიერი საღამო მომიწყეს, ეს იყო შემოდგომის ფოთლების სიმფონია. არაჩვეულებრივმა მომღერლებმა შეასრულეს ჩემს ცნობილ ლექსებზე შესრულებული ცნობილი სიმღერები. ძალიან მიყვარს მესხეთი, მესამედ ჩამოვედი აქ და იმედი მაქვს, რომ ხშირად მომიწევს ჩამოსვლა", – ამბობს თინათინ მღვდლიაშვილი.

პოეტს სურვილი გაუჩნდა მისი პოეზიის საღამო ახალციხის ციხეზეც გაიმართოს, რაზეც ქალაქის მერისგან, გიორგი კოპაძისგან მხარდაჭერა მიიღო.

"იმედი მაქვს, რომ ახალციხის ციხე–სიმაგრიდან გადმოვძახებ ახალციხეს", – გვითხრა თინათინ მღვდლიაშვილმა ღონისძიების დასასრულს.

ახალციხის ცენტრალურ ბიბლიოთეკაში შეკრებილ საზოგადოებას მისი ლექსების კრებულის შეძენაც შეეძლო.

[თამარ თოთაძე, ახალციხე]