10 000 ლარი პოეზიის საღამოსთვის

,,პოეზიისა და მუსიკის საღამოს“ ორგანიზებისათვის ტენდერში მონაწილეობისთვის წინადადების მიღება 21 სექტემბერს დაიწყო და დღეს, 23 სექტემბერს დასრულდება.

სატენდერო დოკუმენტაციის თანახმად, ღონისძიება მესხეთის სახელმწიფო დრამატულ თეატრში გაიმართება. ტენდერში გამარჯვებულმა კომპანიამ 10 800 ლარის ფარგლებში ქართული ესტრადის არანაკლებ 3 პოპულარული კვარტეტი უნდა მოიწვიოს, რომლებიც ნანა ცინცაძის ლექსებზე შექმნილ სიმღერებს შეასრულებენ.

ასევე ქართული ესტრადის ხუთი პოპულარული ქალი მომღერალი და არანაკლებ ექვსი ცნობილი ქართველი მომღერალი მამაკაცი, რომელიც შეასრულებს ცნობილი ქართველი პოეტის ნანა ცინცაძის ლექსებზე შექმნილ სიმღერებს.

როგორც ახალციხის მერიაში განმარტავენ, ნანა ცინცაძის პოეზიის საღამო, ტენდერში გამარჯვებულ კომპანიასთან ხელშეკრულების დადებიდან 5 დღის ვადაში მოეწყობა.

,, პოეტი ნანა ცინცაძე მისი ცნობადობიდან გამომდინარე შეირჩა. მას ახალციხეზე აქვს შექმნილი ჰიმნი, რომელიც გაჟღერდა ახალციხელობაზე. მის ლექსებზე დაწერილია ბევრი სიმღერა. ეს გეგმიური ღონისძიებაა, წლის დასაწყისშივე ჩასმული იყო“ – განმარტავენ მერიაში.

[თაკო ფეიქრიშვილი, ახალციხე]