ახალციხის სამ სკვერში ხეები დარგეს

მთავარი → საზოგადოება 21.10.2014

ახალციხეში, თამარაშვილისა და ცხრა აპრილის ქუჩებზე არსებულ სამ სკვერში, გამწვანების აქცია მოეწყო. აქციის ფარგლებში მოსწავლეებმა 35 ძირი ხე დარგეს.

გამწვანების აქცია ახალციხეში დღეს, 21 ოქტომბერს ბავშვთა და ახალგაზრდობის ეროვნული ცენტრის ორგანიზებით მოეწყო.

"გაზაფხულის სემესტრიდან ვახორციელებთ ეკო პროექტს, რომელიც მიზნად ისახავს მოზარდებში გარემოსდაცვითი ინფორმაციის მიწოდებას. პროექტი გულისხმობდა, როგორც თეორიულ ნაწილს ანუ ტრენინგებს, ამავდროულად სხვადასხვა აქტივობებს", – ამბობს პროექტის თანაკოორდინატორი თამთა ხუციშვილი.

აღნიშნული პროექტის ფარგლებში, თბილისსა და საქართველოს ხუთ ქალაქში, გარდა გამწვანების აქციისა, იგეგმება დასუფთავების აქციები.

"მსგავსი აქციები გაგრძელდება მომავალშიც, ახალციხის შემდეგ ქუთაისში გადავინაცვლებთ. გამწვანების აქციების შემდეგ დაიწყება დასუფთავების აქციები", – ამბობს თამთა ხუციშვილი

პროექტის მხარდამჭერები არიან, როგორც ქალაქ ახალციხის მერია, ასევე საქართველოს რკინიგზა და გარემოსდაცვის ინფორმაციისა და განათლების ცენტრი.

[თამარ თოთაძე, ახალციხე]