ქალაქში ტრანსპორტის მოძრაობა შეზღუდულია

- ”აქამდე მგზავრები უპრობლემოდ დაგვყავს. შეზღუდვა მხოლოდ რაბათის მიმდებარე ტერიტორიაზეა, სადაც პატრულის თანამშრომლები არ გვატარებენ”, -ამბობს ტაქსის მძღოლი ალექსანდრე მაზმიშვილი.

იმის გამო, რომ ავტოსადგურის მიმდებარე ტერიტორია გადაკეტილია, შეზღუდულია სამარშრუტო მიკროავტობუსებისა და ავტობუსების მოძრაობაც.

- ”თბილისის მიმართულებით ”მარშუტკები” ახალი ხიდიდან გადიან. ასპინძის მიმართულებით მეხუთე საჯარო სკოლის მიმდებარე ტერიტორიიდან, ხოლო ადიგენის მიმართულებით ვალის გადასახვევიდან”, - გვიხსნის უფროსი დისპეჩერი შოთა ჟუჟუნაძე.

ავტოსადგურის დროებით გადაკეტვამ მგზავრების დაბნეულობა გამოიწვია.

- ”ბორჯომში მივდივართ, მაგრამ სადგურში არცერთი ”მარშუტკა” არ დგას. იმედია საღამომდე გაიხსნება გზები და შევძლებთ სახლში დაბრუნებას”, -ამბობს ბორჯომელი რუსუდან გოგოლაძე.



[თინათინ ზაზაძე, ახალციხე]