გიორგი კოპაძემ აგვისტოს ომში დაღუპული ახალგაზრდის ხსოვნას პატივი მიაგო

დილიდან აგვისტოს ომში გმირულად დაღუპულ ანზორ გელდიაშვილის საფლავზე ოჯახის წევრები, ნათესავები, ახალციხის მერი და მერიის თანამშრომლები შეიკრიბნენ და ყვავილებითა და სანთლებით გარდაცვლილის ხსოვნას პატივი მიაგეს.

„წლების განმავლობაში ადგილობრივ ხელისუფლებას ვთხოვდი, რომ ერთი ყვავილით მაინც დაეფასებინათ ჩემი შვილი, მაგრამ არავინ არ მოსულა. გული მტკიოდა როცა გარდაცვლილი შვილის დედები ამბობდნენ, რომ ამან ეს გაგვიკეთა და იმან ეს მოგვიტანაო“, – ამბობს ანზორ გელდიაშვილის დედა მზია ღონღაძე.

ახალციხის მერმა გარდაცვლილის ოჯახის წევრებს თანადგომა გამოუცხადა, გიორგი კოპაძის თქმით სამცხე – ჯავახეთში ყველამ უნდა იცოდეს, რომ ანზორ გელდიაშვილი სამშობლოს ვაჟკაცურად შეეწირა.

„ოჯახს ფინანსურად არ უჭირს, მათ სახელმწიფო ყოველთვიურად დახმარებას აძლევს. ოჯახის წევრებს უნდათ, რომ გავამხნევოთ, მათი შვილის ხსოვნას პატივი მივაგოთ, დღეს სწორედ ამისთვის ვართ აქ. ყველამ უნდა გაიგოს თუ როგორი ვაჟკაცი ბიჭი იყო ანზორ გელდიაშვილი“, – ამბობს კოპაძე.

უმცროსი სერჟანტი ანზორ გელდიაშვილი სენაკის მეორე ქვეით ბრიგადაში მსახურობდა. ის 2008 წლის 11 აგვისტოს გორში დაიღუპა.


[მანანა სარაშვილი, ახალციხე]