ახალციხის სოფლებს საარჩევნო მასალებისგან ასუფთავებენ

დასუფთავების აქციაში, რომელიც დღეს, 29 აგვისტოს დაიწყო და ორი დღის განმავლობაში გაგრძელდება, ახალციხის თემის მუნიციპალიტეტის გამგებელი ზაზა მელიქიძეც ჩაერთო. თემის მუნიციპალიტეტის გამგეობის თანამშრომლებთან ერთად გამგებელმა დასუფთავების აქცია სოფელ აწყურიდან დაიწყო.

„როგორც საქართველოში, ასევე ჩვენს მუნიციპალიტეტში მიმდინარეობს დასუფთავების აქცია. ეს არ არის პოლიტიკური აქცია, არჩევნების შემდეგ დარჩენილ პლაკატებისგან ვწმენდთ ადგილებს. ჩვენ თავის დროზე, არჩევნებიდან ორი კვირის განმავლობაში ძირითადი პლაკატები ჩამოვხსენით, მაგრამ დარჩენილია და დღეს ვახორციელებთ მის გაწმენდას“, – ამბობს ახალციხის თემის მუნიციპალიტეტის გამგებელი ზაზა მელიქიძე.

სოფელ აწყურში დასუფთავების აქციას ადგილობრივი მოსახლეობაც შეუერთდა და სოფელში, ცენტრალური გზის მიმდებარე ტერიტორიაც დაასუფთავეს.

შეგახსენებთ, რომ საარჩევნო–სააგიტაციო მასალებისგან ქუჩებს საქართველოს მასშტაბით ყველგან წმენდენ.

[თინათინ ზაზაძე, ახალციხე]