ახალციხის მუნიციპალიტეტში დასუფთავების აქცია მოეწყო

ადმინისტრაციული და საჯარო სამსახურების თანამშრომლებმა მათი შენობების მიმდებარე ტერიტორიები დაასუფთავეს.

- „სამცხე-ჯავახეთის სახელმწიფო სასწავლო უნივერსიტეტი თავისი აკადემიური პერსონალით გამოვიდა. ჩვენ პირველად მივიღეთ მონაწილეობა და ჩვენი უნივერსიტეტის მიმდებარე ტერიტორია დავასუფთავეთ. მოხარული ვიქნები, თუ მსგავსი აქცია ტრადიციული გახდება და ხშირად გაიმართება“,-ამბობს სამცხე-ჯავახეთის სახელმწიფო სასწავლო უნივერისტეტის ადმინისტრაციის ხელმძღვანელი ბიძინა მაისურაძე.

უნივერსიტეტში იმყოფებოდა ახალციხის მუნიციპალიტეტის გამგებლის მოვალეობის შემსრულებლის მოადგილე თამარ გოგოლაძეც: „გამგეობის თანამშრომლების ნაწილი რაბათშია, ნაწილი სკოლებთან. მე უნივერსიტეტში ვიმყოფები“.

მისი თქმით, ყველა ადამიანმა უნდა იზრუნოს საკუთარ ქალაქზე. ამ შემთხვევაში კი აქციას სიმბოლური დატვირთვა აქვს: „თქვენ იცით, რომ ხვალ ახალციხელობაა და წინა დღით დავასუფთავეთ ქალაქი. ხვალ სუფთა ქალაქში ვიზეიმებთ ახალციხელობას“.

დასუფთავების აქცია ახალციხის მუნიციპალიტეტის სოფლებშიც მოეწყო. ამ მომენტისთვის აქცია დასრულებულია.

[ნინო ზედგინიძე, ახალციხე]