ახალციხეში მერაბ რატიშვილის წიგნების პრეზენტაცია გაიმართა

მერაბ რატიშვილი ახალციხეში ახალციხის ციხის ადმინისტრაციის მოწვევით ჩამოვიდა. "ჯუღა", "თეთრი ლამა" და "დაკარგული ფურცლები" მწერალმა პატიმრობაში ყოფნის დროს დაწერა.

"პირველი ჩემი ნაწარმოები იყო "ჯუღა", მისი მეორე ნაწილია "ილიადი", ეს არის რამდენიმე ეპოქის შერწყმა, მაგრამ უმეტესად მოვლენები ვითარდება მეოცე საუკუნის ბოლოს. მეორე ნაწარმოებია "თეთრი ლამა", ქართველ მედიუმზე, რომელმაც იმოგზაურა მთელს მსოფლიოში და თავისი სიცოცხლე დაასრულა ტიბეტის მონასტერში", – ამბობს მერაბ რატიშვილი და ამატებს, რომ ამ ნაწარმოებში იგი ტიბეტურ–ხევსურულ კვალის ერთობაზე საუბრობს.

მესამე ნაწარმოები, რომელიც მერაბ რატიშვილმა ახალციხის ციხის საკონფერენციო დარბაზში შეკრებილ საზოგადოებას წარუდგინა "დაკარგული ფურცლებია".

"ეს არის წიგნი, რომელიც მიეძღვნა დიდ ქართველ მწერალს, უდიდეს ადამიანს ჭაბუა ამირეჯიბს და პრაქტიკულად ეს არის დათა თუთაშხიას გაგრძელება", – ამბობს წიგნის ავტორი და ამატებს, რომ ამ წიგნის გამოცემის კურთხევა ჭაბუა ამირეჯიბისგან მიიღო.

მერაბ რატიშვილი 5 წლის განმავლობაში ციხეში იყო. სწორედ საპატიმროში ყოფნის დროს, დაახლოებით ორი წლის განმავლობაში დაწერა სამივე წიგნი. გარდა ამისა დაწერილი აქვს ლექსები და მოთხრობებიც.

[თამარ თოთაძე, ახალციხე]