ასპინძამ რაგბის საერთაშორისო ფესტივალს უმასპინძლა

საერთაშორისო ფესტივალში 15 წლამდე ასაკის მორაგბეები მონაწილეობდნენ. გამარჯვება საქართველოს გუნდმა მოიპოვა. მონაწილეებს ჯილდოები და საჩუქრები ასპინძის მუნიციპალიტეტის გამგებელმა ლევან ცაბაძემ გადასცა.

ფესტივალის მიზანი ასპინძის სარაგბო ბაზის გახსნა და ამ სპორტის პოპულარიზაცია იყო.

"ძალიან კმაყოფილი ვარ ზოგადად ამ ფესტივალით. რაც შეეხება რაგბს, ჩემპიონატი წრიული სისტემით ჩატარდა. ყველა მორაგბემ საკმაოდ კარგად ითამაშა და საკუთარი შესაძლებლობები საუკეთესოდ წარმოაჩინა. განსაკუთრებით მნიშვნელოვანი იყო ეს მატჩი, რადგან ჩვენ ზოგადი წარმოდგენა შეგვექმნა 15 წლამდე ასაკობრივ რაგბის ნაკრებ გუნდებში რა რეზერვი გვეზრდება. ვთვლი, რომ კარგი ხარისხის თამაში აჩვენეს თავის ასაკთან შედარებით და იმედი მაქვს გაცილებით საინტერესო გახდება იგი მომავლში", - ამბობს საქართველოს რაგბის კავშირის განვითარების კომიტეტის თავმჯდომარე გიორგი ჭუმბურიძე.

ასპინძის სარაგბო ბაზაზე გამართულ ფესტივალს საქართველოს რაგბის კავშირის საგარეო ურთიერთობათა კომიტეტის თავმჯდომარე ლაშა ხურციძე და საქართველოს რაგბის ეროვნული ნაკრების მწვრთნელი მინტოლ ჰეიგი ესწრებოდნენ.

საერთაშორისო ფესტივალის მეორე დღეს, ასპიძის კულტურისა და ხელოვნების ცენტრთან არსებულმა შემოქმედებითმა გუნდებმა და ახალციხის ქორეოგრაფიულმა ანსამბლის წევრებმა სტუმრებს რამდენიმე საათის განმავლობაში საინტერესო და მხიარული ნომრები შესთავაზეს. კონცერტის დასრულების შემდეგ სტუმრებმა მხარის სამონასტრო კომპლექსი ვარძია დაათვალიერეს.

[Sknews.ge]