ასპინძის ბაზაზე რაგბის ფესტივალი გაიმართა [R]

რაგბის ფესტივალი დღეს, 19 მაისს გაიმართა. მასში ყველა ასაკობრივი ჯგუფის მორაგბე მონაწილეობდა.

ფესტივალის უმაღლეს ასაკში სპორტსმენებმა "აფხაზეთის ტურნირი" გაითამაშეს, რომელშიც მონაწილეობა აფხაზეთის, ზუგდიდის, ადიგენის, ახალციხის, ასპინძისა და ბორჯომის, სულ ექვსმა გუნდმა მიიღო.

პირველი ადგილი ზუგდიდელებმა მოიპოვეს, მეორე ადგილზე ბორჯომი გავიდა, ხოლო მესამე ადგილზე - ადიგენი.

"აფხაზეთის ტურნირის" თასები გუნდებს აფხაზეთის ავტონომიური რესპუბლიკის განათლებისა და კულტურის მინისტრმა როლანდ ნიჟარაძემ და სპორტისა და ახალგაზრდულ საქმეთა სამსახურის უფროსმა ვიტალი ბენდელიანმა გადასცეს.

ასპინძის ბაზაზე თამაშებს ესწრებოდა საქველმოქმედო ფონდი "ქართუს" გამგეობის თავმჯდომარე ნიკოლოზ ჩხეტიანი.

ფესტივალი აფხაზეთის ავტონომიური რესპუბლიკის განათლებისა და კულტურის სამინისტროს, აფხაზეთის რაგბის ფედერაციის და რაგბის კლუბ "ტაოს" ერთობლივი ორგანიზებით ჩატარდა.

"ზოგადად, სარაგბო ფესტივალი დიდი სარაგბო ზეიმია. იგი ფიზიკური წვრთნის პროცესის გაგრძელებად მოიაზრება. ფესტივალზე ჯანსაღი გარემოა და მონაწილეების ფიზიკური მონაცემების ან სქესის მიხედვით არ გამოვარჩევთ, ნახავთ არაჩევულებრივ გოგონა მორაგბეებსაც. აქ არ არსებობს არც დამარცხებული და არც გამარჯვებული. მთავარი თანაბრობა და ერთმანეთის პატივისცემაა", - განმარტავენ სარაგბო კლუბ "ტაოში".

[sknews.ge]