ახალგაზრდა მამაკაცის დაჭრაში ბრალდებული დუმილის უფლებას იყენებს

დღეს, 25 ივლისს, ახალციხის რაიონულ სასამართლოში 37 წლის მამაკაცის დაჭრაში ბრალდებული 20 წლის ბ.ხ-ს აღკვეთის ღონისძიების შეფარდებაზე დაახლოებით ერთი საათის განმავლობაში იმსჯელეს.

პროკურორ მამუკა ქომოშვილის განცხადებით, ბრალდებულმა, 22 ივლისს, კოსტავას ქუჩაზე, მამაკაცს 12 ჭრილობა მიაყენა, მან ეს განზრახ ჩაიდინა. ამიტომ ქომოშვილმა მის მიმართ აღკვეთის ღონისძიებად გირაო პატიმრობის უზრუნველყოფით მოითხოვა და გირაოს ოდენობად 10 000 ლარი დაასახელა.

„წინააღმდეგ შემთხვევაში იგი შეიძლება მიიმალოს. ამასთან ბრალდებული გამოძიებასთან არ თანამშრომლობს და დუმილის უფლებას იყენებს“, - განაცხადა ქომოშვილმა

არ დაეთანხმა ბრალმდებელს ბ.ხ-ს ადვოკატი ირაკლი ბარძიმაძე. მისი თქმით, სათვალთვალო კამერების ჩანაწერებში აშკარად ჩანს თუ როგორ ცდილობდა დაზარალებული ბრალდებულის ტოტალიზატორ „კრისტალ ბეთიდან“ გამოყვანას, ამიტომ იმის მტკიცება, რომ ბრალდებულმა დანაშაული განზრახ ჩაიდინა, დაუშვებელია. მისივე თქმით, იგივეს ყვებიან დაკითხული მოწმეები, რაც სათვალთვალო კამერის ჩანაწერებში ჩანს.

ბარძიმაძის განცხადებით, არც ბრალდებულის მიმალვის საფრთხე არ არსებობს, რადგან იგი, მაშინ როცა დააკავეს, არსად გარბოდა: „სახლში მიდიოდა და მიმალვა არც უცდია“.

რაც შეეხება გირაოს ოდენობას, ადვოკატი ამბობს, რომ ოჯახს ეკონომოიურად მისი დაფარვის საშუალება არ აქვს: „ამიტომ ვშუამდგომლობ, დავტოვოთ აღკვეთის ღონისძიების გარეშე, ან შეეფარდოს გაუსვლელობა, პოლიციაში გამოცხადდეს გარკვეული პერიოდის განმავლობაში და დამატებით ღონისძიების სახით ჩამოვართვათ პირადობა“.

მოსამართლე გია ბერაიამ პროკურორის შუამდგომლობა დააკმაყოფილა, ოღონდ ნაწილობრივ. ბრალდებულს პატიმრობა გირაოს, 4 000 ლარის, უზრუნველყოფით შეეფარდა და გადახდის ვადად 40 დღე განესაზღვრა.

„მოსამართლემ უკანონო გადაწყვეტილება მიიღო. მან ამ გადაწყვეტილებით არ გაითვალისწინა ის გარემოება, შეუძლია თუ არა ოჯახს 4 000 ლარის უზრუნველყოფა“, - განაცხადა სასამართლო პროცესის დასრულების შემდეგ ბარძიმაძემ.

წინა სასამართლო სხდომა 15 სექტემბერს, 14:00 საათზე ჩაინიშნა.

შეგახსენებთ, 22 ივლისს, დაახლოებით 20:30 საათზე, ახალციხეში, კოსტავას ქუჩაზე, ახალგაზრდა მამაკაცი დაჭრილი ნახეს. მომხდარს შსს-ს სამცხე-ჯავახეთის სამხარეო მთავარი სამმართველო, სისხლის სამართლის კოდექსის 120-ე მუხლით იძიებს, რაც ჯანმრთელობის განზრახ ნაკლებად მძიმე დაზიანებას გულისხმობს.

[თამუნა უჩიძე, ახალციხე]