ახალციხეში 45 წლამდე ასაკის მამაკაცს ახალგაზრდა ბიჭის გაუპატიურებაში ადანაშაულებენ

ბრალდებული დაახლოებით 45 წლის მამაკაცია, დაზარალებულის ასაკი კი დაახლოებით 18 წელია. ბრალდებულიცა და დაზარალებულიც ახალციხის მცხოვრებლები არიან.

სამცხე-ჯავახეთის სამხარეო მთავარი სამმართველოს თანამშრომლებმა ბრალდებული კვირას, 25 მაისს დააკავეს. მას ბრალი სსკ-ის 138–ე მუხლის პირველი ნაწილით ედება, რაც სექსუალური სახით ძალმომრეობით ქმედებას გულისხმობს და სასჯელის ზომად თავისუფლების აღკვეთას 4-დან 6-წლამდე ითვალისწინებს.

დღეს, 27 მაისს ბრალდებულს აღკვეთის ღონისძიებად პატიმრობა შეეფარდა. პროცესი დახურული იყო. როგორც შინაგან საქმეთა სამინისტროს პრესსამსახურში აცხადებენ, ბრალდებული დანაშაულს აღიარებს.

რადგან საქმე სქესობრივ დანაშაულს ეხება, არც დაცვისა და არც ბრალდების მხარე დეტალებზე არ საუბრობს.

„პროცესი დახურული იყო და ბრალდებულთან შეთანხმების გარეშე ვერაფერს გეტყვით“, - გვითხრა ბრალდებულის ადვოკატმა დავით ზარიძემ.

[თამუნა უჩიძე, ახალციხე]