ახალციხეში რვა სასოფლო–სამეურნეო კოოპერატივი შეიქმნა

კოოპერატივების შექმნა მიმდინარე წელს დაიწყო. იმისათვის, რომ სასოფლო–სამეურნეო კოოპერატივის სტატუსი მიენიჭოთ, ფერმერებმა რეგისტრაცია ჯერ საჯარო რეესტრში უნდა გაიარონ. ამის შემდეგ აღნიშნულ დოკუმენტებს სასოფლო–სამეურნეო კოოპერატივების მართვის სააგენტოში წარადგენენ, სადაც გადაწყდება მიენიჭებათ თუ არა კოოპერატივის სტატუსი.

ახალციხის მუნიციპალიტეტში უკვე სასოფლო–სამეურნეო კოოპერატივის სტატუსის მქონე რვა სუბიექტი დარეგისტრირდა. აღნიშნულ სამსახურში განმარტავენ, რომ ახალციხე ერთ–ერთია იმ მუნიციპალიტეტებს შორის, სადაც ყველაზე მეტი კოოპერატივი შეიქმნა.
„ერთობაში“, რომელიც ქალაქ ახალციხეში შეიქმნა, 9 ფერმერია გაერთიანებული. მათ საქმიანობას მეკარტოფილეობა და მებოსტნეობა წარმოადგენს.

„წირის მერძევეები“ სოფელ წირაში შეიქმნა. აქ 4 ფერმერი ერთიანდება და მათი საქმიანობა საქონლის მოშენება და საკვები პროდუქტების მიღება, გადამუშავება, დაფასოება, შეფუთვა, შენახვა, გადაზიდვა და რეალიზაციაა.

„ელიტა“ სოფელ წყალთბილაში მცხოვრები ფერმერების გაერთიანებაა, აქაც ოთხი წევრია. მათი ძირითადი საქმიანობა კარტოფილის, კარტოფილის თესლის, მარცვლეული კულტურების მოყვანა, შენახვა, გადაზიდვა და რეალიზაციაა.

„საჩვენებელ საფუტკრეში“ ექვსი წევრი ერთიანდება, რომელთა ძირითად საქმიანობას მეფუტკრეობა და მასთან დაკავშირებული ნაწარმის, თაფლის, ცვილის, რძის დინდგელის, ჭეოსა და შხამის მიღება–გადამუშავება, შეფუთვა, შენახვა, გადაზიდვა და რეალიზაცია წარმოადგენს.

კოოპერატივი „გ.მ.გ.ნ.კ.“ სოფელ მინაძეში შეიქმნა. აქ ხუთი წევრია გაერთიანებული. მათ ძირითად საქმიანობას ცხვრის მოშენება, ძვირფასი ნედლეულისა და საკვები პროდუქტების მიღება და რეალიზაცია წარმოადგენს.

ახალციხის მუნიციპალიტეტის სოფელ ჭაჭარაქში სასოფლო–სამეურნეო სტატუსის მქონე ორი კოოპერატივია, „ჭაჭარაქი“ და „ჭალა“. მათ ძირითად საქმიანობას მემცენარეობისა და მეცხოველეობის პროდუქციის წარმოება წარმოადგენს. იგივე საქმიანობა აქვთ კოოპერატივ „მერცხალის“ წევრებსაც, რომელიც ახალციხეშია დარეგისტრირებული და რომელშიც 5 ფერმერი ერთიანდება.

ახალციხის მუნიციპალიტეტის სასოფლო–საკონსულტაციო სამსახურში განმარტავენ, რომ სასოფლო–სამეურნეო კოოპერატივების შექმნა გრძელდება.

[თამარ თოთაძე, ახალციხე]