სასოფლო-სამეურნეო კოოპერატივების განვითარების სააგენტოს წარმომადგენლები ახალციხის მუნიციპალიტეტში მცხოვრებ ფერმერებს შეხვდნენ და კოოპერატივების შესახებ დეტალური ინფორმაცია მიაწოდეს. შეხვედრა იმ საინფორმაციო კამპანიის ფარგლებში გაიმართა, რომელსაც სააგენტო მთელი საქართველოს მასშტაბით ატარებს.
როგორც სასოფლო-სამეურნეო კოოპერატივების განვითარების სააგენტოს თავმჯდომარე გიორგი მიშელაძე აღნიშნავს, ფერმერების მხრიდან დაინტერესება დიდია.
„ამ კამპანიის ფარგლებში ვხვდებით საქართველოს ყველა რაიონის ფერმერებს, გლეხებს, რომლებიც დაინტერესებული არიან კოოპერაციით. ვუხსნით რა სიკეთე შეიძლება მოუტანოს მათ კოოპერატივში გაერთიანებამ და სასოფლო-სამეურნეო კოოპერატივის სტატუსის მოპოვების შემდგომ რა საგადასახადო შღავათები ექნებათ. ასევე, რა სახელმწიფო პროგრამები იგეგმება მათი განვითარებისთვის და ასე შემდეგ“, - განმარტავს იგი.
მიშელაძე ამბობს, რომ კოოპერატივი სტატუსის მინიჭებისთანავე ექცევა საგადასახადო შეღავათების არეალში: „მიუხედავად იმისა, რომ კოოპერატივი არის მეწარმე სუბიექტი, განხორციელებული საკონონმდებლო ცვლილებების საფუძველზე, ხდება გრანტის მიმღები, რომლისთვისაც გადაცემული გრანტი იქნება დაუბეგრავი. გარდა ამისა, მონაწილეობას მიიღებენ სხვადასხვა სახელმწიფო პროგრამებში. ამ ეტაპზე უკვე შემუშავებულია და დამტკიცების ეტაპზეა მცირეგაბარიტიანი ტექნიკის საშეღავათო პროგრამა, რომლის ფარგლებშიც კოოპერატივებს სასოფლო-სამეურნეო ტექნიკა გადაეცემათ“.
გარდა სახელმწიფო დაფინანსებისა, ამ მიმართულებით გრანტი „რეგიონული განვითარების ასოციაციასაც“ აქვს გამოცხდებული.
„ჩვენმა ორგანიზაციამ ბი-პის დაფინანსებით დაახლოებით 500-დან 20 ათას დოლარამდე გრანტი გამოაცხადა. ეს თანხა გადაეცემათ კოოპერატივებს, რომლებსაც აქვთ კარგად ჩამოყალიბებული ბიზნეს გეგმა. თუმცა, ეს ეხება სამცხე-ჯავახეთის მხოლოდ სამ მუნიციპალიტეტს: ბორჯომს, ადიგენსა და ახალციხეს“, - განმარტავს „რეგიონული განვითარების ასოციაციის“ ხელმძღვანელი ნანა ზუბაშვილი.
ახალციხის მუნიციპალიტეტში სასოფლო-სამეურნეო კოოპერატივების დარეგისტრირება უკვე მიმდინარეობს. ახალციხის მუნიციპალიტეტის საინფორმაციო-საკონსულტაციო სამსახურის მთავარი სპეციალისტი ალექსი კოსტანიშვილი ამბობს, რომ ამ ეტაპზე სოფლის მურნეობის განვითარებისთვის ერთ-ერთი ძირითადი საკითხია სოფლად კოოპერატივების შექმნა.
„კოოპერატივები ბევრად უმარტივებს მოსახლეობას როგორც მიწის დამუშავებას, ასევე პროდუქციის წარმოებასა და მის რეალიზაციას. ჩვენ სამსახურში ამ ეტაპზე დარეგისტრირებულია უკვე 35 ფერმერი, რომლებსაც სურვილი აქვთ, რომ სასოფლო-სამეურნეო კოოპერატივი ჩამოაყალიბონ“, - ამბობს ალექსი კოსტანიშვილი.
ხაჩატურ ჩახოიანი, რომელიც ახალციხის მუნიციპალიტეტის სოფელ წყრუთში ცხოვრობს, ერთ-ერთია მათ შორის, ვისაც სასოფლო-სამეუნეო კოოპერატივის ჩამოყალიბების სურვილი გაუჩნდა.
„დიდი ხანია სოფლის მეურნეობის სფეროში ძალების გაერთიანებას ვცდილობ, საბედნიეროდ დაიწყო კოოპერატივების განვითარების პროგრამა. ვფიქრობ, რომ წყრუთში სარწყავი წყლის სისტემის არ არსებობის გამო, კოოპერატივის ჩამოყალიბება მეცხოველეობის კუთხით გაამართლებს“, - ამბობს იგი.
[თამარ თოთაძე, ახალციხე]