სამცხე–ჯავახეთს არდაჰანის გუბერნიის ხელმძღვანელობა და ბიზნესმენები ეწვევიან

ვიზიტი სამცხე-ჯავახეთისა და არდაჰანის მხარეს შორის მეგობრული ურთიერთობების გაღრმავებას და ეკონომიკური თანამშრომლობის განვითარებას ისახავს მიზნად.

არდაჰანის, ფოსოფისა და ბურსას ოფიციალური პირების გარდა, სამცხე-ჯავახეთს მეზობელი რეგიონის ბიზნესმენთა 60 კაციანი დელეგაციაც ეწვევა. სტუმრები მხარეში არსებული სოციალურ-ეკონომიკური მდგომარეობით, მხარის ბუნებრივი რესურსებითა და ტურისტული პოტენციალით ინტერესდებიან.

ვიზიტის ფარგლებში თურქი სტუმრები ახალციხის ღირსშესანიშნაობებს (ახალციხის ციხე), ასევე მიმდინარე და დასრულებულ ინფრასტრუქტურულ პროექტებს დაათვალიერებენ. სტუმრები შეხვდებიან სამცხე-ჯავახეთის სახელმწიფო უნივერსიტეტის რექტორს მერაბ ბერიძეს.

ვიზიტის ფარგლებში გაიმართება ბიზნეს ფორუმი, რომელშიც თურქ ბიზნესმენებთან ერთად სამცხე-ჯავახეთის ბიზნესმენებიც მიიღებენ მონაწილეობას. ბიზნეს ფორუმზე მხარეები ერთობლივ საინვესტიციო და ბიზნეს პროექტებს განიხილავენ, ისაუბრებენ საზღვრისპირა რეგიონებს შორის სავაჭრო-ეკონომიკური ურთიერთობების, ასევე კულტურის, განათლებისა და სხვა სფეროებში აქტიური თანამშრომლობის პერსპექტივებზეც.

დღის ბოლოს ბიზნესმენები ბორჯომში მინერალური წყლის ქარხანას დაათვალიერებენ და გაემგზავრებიან თბილისში, სადაც ასევე დაგეგმილია სხვადასხვა სახის შეხვედრები.

[Sknews.ge]