205 ათასი ლარი ბორჯომის გამგეობაში ინვენტარის შესაძენად

ბორჯომის ადმინისტრაციული შენობა, დაახლოებით 8 დღეა, რაც ყოფილი აგრარული ბაზრის ტერიტორიაზე გადავიდა. მანამდე მას რუსთაველის მოედანზე, 5,000 კვადრატულ მეტრ ფართობზე გაშლილი, ათსართულიანი შენობა ეკავა, რომელიც ინვესტორს გადაეცა და ახლა აქ სასტუმრო კეთდება.

ახალგარემონტებულ შენობაში ბორჯომის მუნიციპალიტეტის გამგეობა, საკრებულო, სუბსიდიების სააგენტო, განათლების რესურცენტრი და სამხედრო გაწვევის სამსახური განთავსდა. ახალ შენობაში, რომელსაც 1,500 კვადრატული მეტრი უკავია, ინვენტარის შესაძენად 205 ათასი ლარი გაიწერა.

- ”30-35 წლის განმავლობაში და არც ახლა მეორე მოწვევის მუნიციპალიტეტში, ახალი არაფერი შეძენილა. ამიტომ ინვენტარი ძალიან მოძველებული იყო და განახლებას საჭიროებდა. საკრებულომ მიიღო შესაბამისი დადგენილება და ტენდერიც გამოცხადდა”, - გვიხსნის ბორჯომის მუნიციპალიტეტის საკრებულოს თავმჯდომარის მოადგილე ნათელა გოგოლაძე.

მისივე თქმით, ძველი ინვენტარის დიდი ნაწილი გასანადგურებელია, ის კი რისი გამოყენებაც შეიძლება, ბორჯომის საბავშვო ბაღებს და სამუსიკო სკოლას გადაეცემა.

ბორჯომის მუნიციპლიტეტის საკრებულოს წევრი, პარტია ”მრეწველობა გადაარჩენს საქართველოს”წარმომადგენელი ბესიკ ფოფხაძე ინვენტარის შესაძენად გამოყოფილი თანხის რაოდენობას აპროტესტებს: ”წლების განმავლობაში ბორჯომის ბიუჯეტში სოციალური პაკეტი მცირდება და დღეს მინიმუმამდეა დასული. თუ ადამიანი ძალიან გაჭირვებული არ არის და მისი სოციალური მდგომარეობა 70 ათას ქულაზე ქვემოთ არაა, მას არ დაეხმარებიან. ანუ, ასეთი ადამიანები სახელმწიფო მხრიდან უგლებელყოფილნი არიან”.

ამდენად, ფოფხაძის თქმით, ის რომ გამგეობის შენობაში ინვენტარის შეძენისათვის 205 ათასი ლარი გამოიყო, გასაკვირი არაა.

[თამუნა უჩიძე, ბორჯომი]