8 მაისის ღამეს ახალციხეში დაკავებული მამაკაცი დანაშაულს აღიარებს

ახალციხეში მცხოვრები, 1980 წელს დაბადებული ლევონ კ. რომელიც სამართალდამცავებმა 8 მაისს დააკავეს, დანაშაულს აღიარებს.

აღკვეთის ღონისძიებად დაცვის მხარემ 3000 ლარი გირაო მოითხოვა, მის უზრუნველყოფამდე პატიმრობით. ბრალდების მხარემ კი პატიმრობით იშუამდგომლა.

ახალციხის რაიონული სასამართლოს მოსამართლემ მარიკა ჩიტაშვილმა, პროკურორის მამუკა ქომოშვილის შუამდგომლობა დააკმაყოფილა და ლევონ.კ-ს აღკვეთის ღონისძიებად პატიმრობა შეუფარდა.

გამოძიებით დადგენილია, რომ გარიგების საფუძველზე, გარკვეული თანხის სანაცვლოდ, დაკავებულმა მოქალაქეებს ცეცხლსასროლი იარაღები აყიდინა, რომლებიც მათ თავიანთ სახელზე გაიფორმეს, რის შემდეგაც ლევონ კ. აღნიშნული იარაღის უკანონო რეალიზაციას აწარმოებდა.

სამართალდამცველებმა ლევონ კ-ს საცხოვრებელი ბინის ჩხრეკისას სარეალიზაციოდ გამზადებული „ბერეტა“-ს სისტემის 1 პისტოლეტი, „ტაურუსი“-ს სისტემის 1 პისტოლეტი, „გლოკი“-ს სისტემის 1 პისტოლეტი და „გირსანი“-ს სისტემის 1 პისტოლეტი ამოიღეს.

გამოძიება ცეცხლსასროლი იარაღის მართლსაწინააღმდეგო შეძენა-შენახვის, ტარებისა და გადაზიდვა-გასაღების ფაქტებზე მიმდინარეობს (საქართველოს სსკ-ის 236-ე მუხლის 1-ლი, მე-2 და მე-3 ნაწილებით), რაც 3 წლამდე თავისუფლების აღკვეთას ითვალისწინებს.

[თამუნა უჩიძე, ახალციხე]