რატომ იყო დაკეტილი N9 ვალის საარჩევნო უბანი

„ერთიანი ნაციონალური მოძრაობის“ ახალციხის ფეისბუქის გვერდზე გავრცელებული ინფორმაციით 37 ახალციხის საარჩევნო ოლქის N09 ვალის უბანზე დარღვევა დაფიქსირდა.

„დღეს დილიდან ვალის N9 უბანი დაკეტილია, რამაც მოსახლეობის უკმაყოფილება გამოიწვია“, – წერია „ახალციხე ენმ“–ს ფეისბუქის გვერდზე.

აღნიშნულის შესახებ 37 ახალციხის საოლქო საარჩევნო კომისიაში ინფორმაცია აქვთ. კომისიის თავმჯდომარის თეა გავაშელის თქმით, ვალეში მობილური ჯგუფი უკვე გავიდა.

N9 ვალის საუბნო საარჩევნო კომისიის თავმჯდომარე სიმონ გიორგაძე ამ ფაქტს გაუგებრობით ხსნის. როგორც „სამხრეთის კარიბჭესთან“ სატელეფონო საუბარში განმარტავს ამ ეტაპზე უბანი გახსნილია.

„აქ უბრალოდ გაუგებრობა მოხდა, შესვენებაზე გავიდა ადამიანი და გასაღები არ დატოვა, სანამ მეორე მოვიდა გასაღები არ ჰქონდა. დაახლოებით ნახევარი ან ერთი საათის განმავლობაში იყო დაკეტილი. ამ ეტაპზე პრობლემა აღმოფხვრილია“, – განმარტავს სომინ გიორგაძე.

შეგახსენებთ, რომ 2014 წლის 15 ივნისის ადგილობრივი თვითმმართველობის არჩევნებისთვის ვალეში ოთხი უბანი გაიხსნა. N9 საარჩევნო უბანი თამარაშვილის, ბარათაშვილის, ბარათაშვილის შესახვევის, გოგებაშვილის, მანველიშვილისა და თამარ მეფის ქუჩაზე მცხოვრებლებისთვის, სასოფლო კლუბის შენობაშია განთავსებული.



[თამარ თოთაძე, ახალციხე]