რა დაჯდა ახალციხის ციხეში ტურისტული სეზონის გახსნა?

აღნიშნული ღონისძიებისთვის კულტურის სამინისტრომ 9500 ლარი გამოყო.

სეზონის გახსნასთან დაკავშირებით, ციხის ამფითეატრში მოწვეული ანსამბლების: "რუსთავის", "ქართული ხმებისა" და ადგილობრივი ფოლკლორული ანსამბლის "მესხეთის" კონცერტი გაიმართა.

ანსამბლ "რუსთავის" ხელმძღვანელმა ფრიდონ სულაბერიძემ განაცხადა, რომ ამ დღისთვის სპეციალურად ემზადებოდნენ: "მაყურებელს ათამდე ცეკვა წარვუდგინეთ".

კონცერტს საქართველოს სხვადასხვა კუთხიდან ჩამოსული ჯაყელები ესწრებოდნენ. შეგახსენებთ, ჯაყელები სამხრეთ საქართველოს (სამცხის) წარჩინებული ფეოდალური საგვარეულო იყო. ახალციხის ზედა ციხეში არსებობს ჯაყელების სასახლეც.

"ჩვენი მთავარი მიზანი იყო, რომ დღეს მოვსულიყავით და მოვფერებოდით იმ კუთხეს, სადაც ჩვენი წინაპრები მოღვაწეობდნენ და სადაც მრავალი კულტურული ძეგლი შეიქმნა ჯაყელთა თაოსნობით. დღეს გარკვეული გეგმები დავსახეთ, მაგალითდ, ჯაყელთა ოფისის გახსნა ახალციხეში და კულტურულ-საგანმანათლებლო საქმიანობის ხელშეწყობა",- ამბობს ჯაყელ-ათაბაგთა სამთავრო სახლის ლიდერი კახაბერ ჯაყელი და ამატებს, რომ სეზონის გახსნაზე დასასწრებად ჯაყელები საზღვარგარეთიდანაც ჩამოვიდნენ.

ღონისძიებას ადგილობირვი თვითმმართველობის წარმომადგენლებიც ესწრებოდნენ. ახალციხის მუნიციპალიტეტის გამგებლის მოვალეობის შემსრულებელმა მალხაზ ჟუჟუნაძემ ახალციხელებს ახალი ტურისტული სეზონის გახსნა მიულოცა და აღნიშნა, რომ მათ წინ კიდევ არაერთი საინტერესო ღონისძიება ელოდებათ.



[თამარ თოთაძე, ახალციხე]