”ქართული სული 2013” კონცერტით გაგრძელდა

ხელოვნების ფესტივალის ფარგლებში ღონისძიებები წელს ახალციხეშიც ჩატარდა. სამცხე-ჯავახეთის სახელმწიფო სასწავლო უნივერსიტეტში გამართული კონფერენციის შემდეგ, ახალციხის ციხის ტერიტორიაზე ქართული ფოლკლორული და ქორეოგრაფიული ანსამბლების კონცერტი გაიმართა. მასში მონაწილეობა მიიღეს ანსამბლებმა ”ქართული ხმები”, ტრიო ”სიმი, ”მესხეთი”, ”ახალციხე” და ”მზეკარი”. დღევანდელ ღონისძიებაზე საკუთარი ლექსები პოეტმა შოთა წურწუმიამაც წაიკითხა.

დღესვე ახალციხის ციხეში ახალი ტურისტული სეზონი გაიხსნა. ახალციხის მუნიციპალიტეტის საკრებულოს თავმჯდომარის ოლეგ სანდროშვილის თქმით, ფესტივალის ჩატარებისა და ახალი ტურისტული სეზონის გახსნა ერთმანეთს დაემთხვა და იმედოვნებენ, რომ კარგი დასაწყისი ახალი სეზონისთვის წარმატების მომტანი იქნება.

”საუკუნეების განმავლობაში ქართული სული ჰყვაოდა სამცხე-ჯავახეთში, თუმცა, ბოლო საუკუნეების განმავლობაში კი ხდებოდა ქართველობის დაკნინება. მაგრამ მიუხედავად ამისა ქართული გენი მაინც მძლავრობს და ამ ფაქტის ერთ-ერთი მაგალითი ის არის, რომ ახალციხეში ფესტივალი ”ქართული სული” ტარდება. რომელიც ქართველებს ახალი სულისკვეთებით გვაძლევს ვალდებულებას, რომ ავაღორძინოთ ყოველივე რაც ჩვენს მხარეში იყო”, - ამბობს ოლეგ სანდროშვილი.

ახალციხის შემდეგ კი ფესტივალის მომდევნო ღონისძიება 28 მაისს თბილისში გურამ თამაზაშვილისადმი მიძღვნილი საღამო გაიმართება. ანსამბლ ”ქართული ხმების” გამორჩეულ წევრსა და სოლისტს, ანსამბლ ”ალილოს” დამაარსებელს გურამ თამაზაშვილს დაბადებიდან 60 წელი შეუსრულდებოდა ამ ტარიღის აღსანიშნავად კონცერტში მონაწილეობას ანსამბლები ”ალილო” და ”ქართული ხმები მიიღებენ. მიმდინარე წლის 5 ივნისს კი ფესტივალის ფარგლებში ფარნაოზ ლაპიაშვილის ნამუშევრების გამოფენა გაიმართება. პროფესორი ფარნაოზ ლაპიაშვილი, საქართველოს სახალხო მხატვარი, სახელმწიფო პრემიის ლაურეატი და ქართული სცენოგრაფიის ერთ-ერთი დამფუძნებელი წლების განმავლობაში სამხატვრო აკადემიაში თეატრალურ-დემოკრატიულ სახელოსნოს ხელმძღვანელობდა.

[თამარ თოთაძე, ახალციხე]