ვანო მერაბიშვილი საავადმყოფოდან ციხეში გადაიყვანეს

პენიტენციურ სამსახურში მსჯავდებულის საპატიმროში დაბრუნების გადაწყვეტილება, სამედიცინო გამოკვლევების შედეგებიდან გამომდინარე მიიღეს. ექიმის ელენე ხურციძის თქმით, ამ ეტაპზე გამორციხულია რაიმე ისეთი პათოლოგია, რომელიც მერაბიშვილის ჯანმრთელობას საფრთხეს შეუქმნის.

“გამორიცხულია მწვავე მდგომარეობა, როგორც სიმსივნური პათოლოგია, ასევე სხვა მწვავე პათოლოგია, რომელიც პაციენტის ჯანმრთელობას საფრთხეს შეუქმნიდა. ასევე გამორიცხულია მწვავე ეგზოგენური ინტოქსიკაციის რაიმე ნიშნები. ამჟამად, მისი მდგომარეობა აბსოლუტურად სტაბილურია და მხოლოდ დაკვირვებით რეჟიმში მკურნალობას საჭიროებს,” – ამბობს ელენე ხურციძე.

ვანო მერაბიშვილის ადვოკატის გიორგი ჩივიაშვილის თქმით, ყოფილი პრემიერისთვის უცხოელი ექიმების ჩამოყვანას გეგმავენ. მათ ამის ნებართვა უკვე აქვთ.

"3 ოქტომბერს, კლინიკა „მედიქლაბ“-ში შეიკრიბა სხვადასხვა პროფილის ექიმებისგან შემდგარი კონსილიუმი, რომლის მიზანიც იყო დადგენილიყო ივანე მერაბიშვილის ჯანმრთელობის გაუარესების მიზეზები და დღეისთვის არსებული დიაგნოზი. განხილვის შედეგად, კონსილიუმი შეთანხმდა, რომ ივანე მერაბიშვილს დღეის მდგომარეობით აქვს ჰორნერის სინდრომი, თუმცა ექიმები ვერ შეთანხმდნენ აღნიშნული სინდრომის გამომწვევი მიზეზების თაობაზე და შესაბამისად დიაგნოზზე.გარდა ამისა, ექიმების ნაწილი თვლის, რომ შესაბამისი მკურნალობის არარსებობის შემთხვევაში, არსებული მდგომარეობა შესაძლოა გაცილებით გამწვავდეს და გადაიზარდოს მენინგიტში.
ვინაიდან კონსილიუმმა ვერ მოახერხა საბოლოო დიაგნოზზე შეთანხმება, დღეის მდგომარეობით, ივანე მერაბიშვილს არანაირი მკურნალობა არ აქვს დანიშნული", – ნათქვამია ვანო მერაბიშვილის ადვოკატების განცხადებაში.

[sknews.ge]