გამოძიების დასრულებამდე ახალციხის გამგებელი სამსახურში ვერ დაბრუნდება

სააპელაციო სასამართოს გადაწყვეტილება ბესიკ ბლიაძეს უკვე ჩაბარდა.

„პასუხში წერია, რომ რადგან ბლიაძის წინააღდეგ საქმის ძიება თანამდებობრივი დანაშაულის გამოა დაწყებული, ვიდრე ამ საქმის შესახებ განაჩენი არ დადგება, მანამდე ახალციხის სასამართლოს გადაწყვეტილებას ძალაში ვტოვებთო“, - ამბობს ბესიკ ბლიაძის ადვოკატი ნუგზარ სამარჯიშვილი და ამატებს, რომ ახლა იგი საქმის შეწყვეტის შესახებ პასუხს სამცხე-ჯავახეთის საოლქო პროკურატურიდან ელოდება.

სამარჯიშვილმა აღნიშნული შუამდგომლობით, პროკურატურას უკვე მიმართა.

შეგახსენებთ, რომ ახალციხის მუნიციპალიტეტის ყოფილ გამგებელს ბრალი 24 მარტს წაუყენეს. მას ბრალი სსკ-ის 341-ე მუხლით ედება, რაც სამსახურეობრივ სიყალბეს გულისხმობს. 25 მარტს ახალციხის რაიონულმა სასამართლომ ბლიაძეს გირაო 4,000 ლარი შეუფარდა. ამავე დღეს გამოიტანა გადაწყვეტილება მისი უფლებამოსილების შეჩერების შესახებ.

[თამუნა უჩიძე, ახალციხე]