„მესხეთის უნივერსიტეტის“ რედაქტორს საქართველოს დამსახურებული ჟურნალისტის წოდება მიენიჭა

მარინა ზედელაშვილმა ჟურნალისტური საქმიანობა 1974 წლიდან დაიწყო. ჯერ რუსთავის საქალაქო გაზეთში მუშაობდა. 1985 წლიდან ადიგენის რაიონული გაზეთის რედაქტორი იყო, 1995 წლიდან, პარალელურად, სამხარეო გაზეთს „სამცხე-ჯავახეთს“ ხელმძღვანელობდა. 1997 წლიდან უნივერსიტეტის გამოცემას ჩაუდგა სათავეში. 2006 წლიდან 2009 წლამდე, დროებით, ჟურნალისტიკას ჩამოშორდა. 2009 წლიდან დღემდე კი „მესხეთის უნივერსიტეტის“ რედაქტორია.

„როგორც კი ჟურნალისტიკის ფაკულტეტი დავამთავრე, იქიდან მოყოლებული ჟურნალისტიკაში ვმუშაობ. მიუხედავად იმისა, რომ სხვა პროფესიაც მქონდა, უნივერსიტეტი დავამთავრე ასტრონომიის სპეციალობით, 28 წლის ვიყავი როცა ჟურნალისტიკაზე ჩავაბარე და მას შემდეგ ჟურნალისტიკაში ვარ, სხვაგან არ გამიხედავს, ძალიან მიყვარს ჩემი პროფესია“, - ამბობს მარინა ზედელაშვილი.

მისი თქმით, მისთვის, როგორც ჟურნალისტისთვის, აღნიშნული ჯილდო მნიშვნელოვანი და მოულოდნელი იყო: „ასე მგონია, რომ მუდმივად აღმართზე ავდივარ. მიუხედავად ჩემი ხანგრძლივი საქმიანობისა, ვფიქრობ, რომ ეს ჯილდო მაინც მოულოდნელი იყო და ძალიან მერიდება, რომ უამრავი კარგი ჟურნალისტი არსებობს და მე გამომარჩიეს. უსაზღვროდ მადლობელი ვარ მათი, ვინც ღირსად ჩამთვალა, რომ ასეთი მაღალი წოდება მოენიჭებინა ჩემთვის“.

[თამარ თოთაძე, ახალციხე]