ადიგენში საგაზაფხულო ბარათების 90 პროცენტი უკან ბრუნდება

ადიგენის მუნიციპალიტეტის სოფელ ქვემო ენეთლის მკვიდრი გიგლა ფანჩვიძე ნაკვეთს ხარებით ფარცხავს. მიწა შემოდგომით მოხდნა და შვრია დათესა კიდეც. ახლა ყანას ლობიოს, სიმინდისა და კარტოფილის დასათესად ამზადებს.

„ერთი ჰექტარი და 25 მეასედი მაქვს. შემოდგომით სულ დავხანი. ახლა ბარათი აღარაფერში მჭირდებოდა და უკან დავაბრუნე, ჯობდა ეგ ბარათი შემოდგომით მოეცათ, - ამბობს ფანჩვიძე და ამატებს, რომ თანხით, რომელიც ბარათის უკან დაბრუნების შემდეგ დაერიცხება, აზოტს იყიდის, - შევწამლავ კარტოფილს, სიმინდს და უკეთესი მოვა“.

ბარათი უკან დააბრუნა ადიგენის მუნიციპალიტეტის სოფელ აბასთუმნის მკვიდრმა თამარ ულარჯიშვილმაც: „დახნული მაქვს მიწა. ავიღო ბარათი და გულზე დავიკიდო!? რად მინდოდა?!“

ულარჯიშვილს, ისევე როგორც წელს, ნაკვეთი შარშანაც დახნული ჰქონდა მაშინ, როცა ხვნისთვის ბარათი მიიღო: „ვის აქვს გაზაფხულზე დაუხნავი მიწა?! მაშინ უნდა დაარიგონ ეს ბარათები, მართლა რომ გვჭირდება დახმარება. შარშან უკან დაბრუნებული ბარათის ფულით კარტოფილის თესლი ვიყიდე, წელს ამბობენ, ეს ბარათები საოშისთვის არ გამოდგებაო, ამიტომ ამ ფულით სტაფილოს და ჭარხლის თესლს შევიძენ“.

ადიგენის მუნიციპალიტეტმა „მცირემიწიან ფერმერთა 2014 წლის საგაზაფხულო სამუშაოების ხელშეწყობის პროექტის“ ფარგლებში 5,466 ბარათი მიიღო. თუმცა, უკვე დარიგებული ბარათების დიდი ნაწილი უკან ბრუნდება.

მაგალითად, ბოლაჯურის საკრებულოში სადაც 2 სოფელი შედის, 412 ვაუჩერი დარიგდა, თუმცა აქედან 388 ადიგენის მუნიციპალიტეტის გმაგეობას უკან ჩაბარდა. სოფელ ადიგენის თემში 308 ვაუჩერიდან უკან 295 დააბრუნეს. ფხეროს საკრებულოში მიღებული 178 ბარათიდან ხვნისთვის მხოლოდ 15-ს გამოიყენებენ, 163 კი კვლავ უკან ჩაბარდებათ. დიდ სმადაში 294-დან 288 გადასცეს ისევ გამგეობას.

„17, ან 18 მარტს უკან დაბრუნებულ ბარათებს სოფლის მეურნეობის სამინისტროში ჩავაბარებ“, - ამბობს ადიგენის მუნიციპალიტეტის გამგებლის მოადგილე არსენ ბალახაშვილი.

მისი თქმით, ქვედა ზონის სოფლებში მიწა 90 პროცენტზე მეტს უკვე დახნული აქვს: „მიწები დასახნავია დერცელის საკრებულოში, სადაც 5 სოფელი შედის და ჭეჭლის საკრებულოში, რომელიც 7 სოფელს აერთიანებს“.

ძირითადი სამუშაო ზედაზონის სოფლებში რომაა, ამაზე შპს „მექანიზატორის“ ახალციხის სერვისცენტრის მენეჯერი კახა ჩინჩალაძეც საუბრობს: „ველოდებით, რომ იქ თოვლი დადნეს“.

ამ დროისთვის ადიგენის მუნიციპალიტეტში შპს „მექანიზატრორიდან“ 9 ტრაქტორია გაგზავნილი.

„მიუხედავად იმისა, რომ შემოდგომით მიწა უმრავლესობამ დახნა, სამუშაო ქვედა ზონის სოფლებში ამ დროისთვის მაინც არის“, - ამბობს ჩინჩალაძე.

[თამუნა უჩიძე, ადიგენი]