მესხეთში ხვნის ბარათების 75%-ს უკან აბრუნებენ

ადიგენის მუნიციპალიტეტის გამგებლის მოადგილემ არსენ ბალახაშვილმა ხვნის ბარათები სოფლის მეურნეობის სამინისტროში დღეს ჩაიტანა. ადიგენის მუნიციპალიტეტში მიღებული 5,466 ბარათიდან უკან 4,463 დაბრუნდა.

„ქვედა ზონის სოფლებში მიწა ყველგან შემოდგომით მოხნეს.ბარათები ზედა ზონიდან, მოხის თემიდან არ დაუბრუნებიათ მხოლოდ“, - ამბობს ბალახაშვილი და ამატებს, რომ მოხის თემისთვის 121 ბარათია გათვალისწინებული.

2,562 ბარათი ჩაიბარა ასპინძის მუნიციპალიტეტის გამგეობამ და ამ დროისთვის უკან 986 დაბრუნდა.

„6 სოფლიდან მობრუნებული ბარათების რაოდენობა ჯერ არ დაგვიჯამებია, 986-ს მინუმუმ 100 უკან დაბრუნებული ბარათი მაინც დაემატება“, - ამბობს ასპინძის მუნიციპალიტეტის სოციალური და ეკონომიკური განვითარების სამსახურის განყოფილების უფროსი დავით პაპაშვილი.

7 000 ბარათი დააბრუნეს უკან გლეხებმა 8 350-დან ახალციხის მუნიციპალიტეტშიც, თუმცა ეს საბოლოო მონაცემი არ არის. როგორც ახალციხის მუნიციპალიტეტის გამგებლის მოადგილე აშოტ მანასიანი ამბობს, გლეხები ბარათებს უკან ამ დრომდე აბრუნებენ.

2 647 ბარათიდან 1900 დააბრუნეს უკან ბორჯომის მუნიციპალიტეტშიც.

ასპინძის, ახალციხისა და ბორჯომის მუნიციპალიტეტებიდან ბარათებს სოფლის მეურნეობის სამინსიტროში უახლოეს დღეებში წაიღებენ. ამის შესახებ მითითებას მუნიციპალიტეტებში სამინისტროდან ელოდებიან.



[sknews.ge]