კაზრეთსა და ჭიათურაში გაფიცული მუშების მხარდასაჭერად თბილისში ვიდეოაქცია გაიმართება

ადამიანის უფლებების სწავლებისა და მონიტორინგის ცენტრის (EMC)ინფორმაციით, რიგითი მოქალაქეების მიერ დაგეგმილი ვიდეოპროექცია, კიდევ ერთი მცდელობაა შეახსენოს სახელმწიფოს მთავარი ვალდებულება, მოუსმინოს საკუთარ მოქალაქეებს და გადახედოს არსებულ სოციალურ პოლიტიკას.

ვიდეოპროექცია იმართება კაზრეთსა და ჭიათურაში გაფიცული მუშების მხარდასაჭერად, რომლებიც უკვე დიდი ხანია, მოითხოვენ შრომის ისეთი პირობების შექმნას, რომელიც უზრუნველყოფს მათი უფლებების დაცვას.

"წინა ხელისუფლების პირობებში გატარებულმა ლიბერალურმა შრომითმა პოლიტიკამ, ისედაც იერარქიულ ურთიერთობებში მყოფი, დასაქმებული ადამიანები ფიზიკურად და სამართლებრივადაც დაუცველი დატოვა დამსაქმებლისგან. სამწუხაროდ, ახალმა ხელისუფლებამ არსებითად არ შეცვალა არსებული პოლიტიკა. რაც ნიშნავს, რომ სახელმწიფოს მთავარი ინტერესი ისევ არ არის ადამიანი და ის კვლავ დაუცველი რჩება სისტემის წინაშე, რომელიც მის სასიცოცხლო ინტერესებს უგულებელყოფს", - ნათქვამია ადამიანის უფლებების სწავლებისა და მონიტორინგის ცენტრის მიერ გავრცელებულ განცხადებაში.

ვიდეოპროექციის პარალელურად იმართება მუშათა მხარდამჭერი აქცია, რომელსაც უერთდებიან: "ადამიანის უფლებების სწავლებისა და მონიტორინგის ცენტრი" (EMC) და "სამართლიანი არჩევნებისა და დემოკრატიის საერთაშორისო საზოგადოება" (ISFED)

ასევე ჯგუფები და ორგანიზაციები, რომლებიც გარემოსდაცვით და კულტურული მემკვიდრეობის საკითხებზე მუშაობენ.

[sknews.ge]