სასოფლო-სამეურნეო კოოპერატივების შექმნა იწყება

შეხვედრა ახალციხის მუნიციპალიტეტის ადმინისტრაციული შენობის საკონფერენციო დარბაზში გაიმართა. მას სამცხე-ჯავახეთის მუნიციპალიტეტების ადგილობრივი თვითმმართველობების, ასევე სოფლის მეურნეობის სამინისტროს საინფორმაციო-საკონსულტაციო სამსახურებისა და არასამთავრობო ორგანიზაციების წარმომადგენლები ესწრებოდნენ.

სასოფლო-სამეურნეო კოოპერატივების განვითარების სააგენტოს წარმომადგენლები საინფორმაციო შეხვედრებს მთელი საქართველოს მასშტაბით მართავენ. დღევანდელ შეხვედრაზე კოოპერატივების შექმნის ძირითად პრინციპებზე ისაუბრეს.

„კოოპერატივის შექმნა ეფუძნება ორ ძირითად პრინციპს, ეს არის დემოკრატიულობა და ნებაყოფლობითობა. დღევანდელ კოოპერატივში არავინ არ აიძულებს გლეხს, რომ გაწევრიანდეს, ხოლო თუ გაწევრიანდება მას ექნება გადაწყვეტილების მიღებაში მონაწილეობის უფლება“, - განმარტავს სასოფლო-სამეურნეო კოოპერატივების განვითარების სააგენტოს თავმჯდომარე გიორგი მიშელაძე.

მისივე თქმით, ყოველივე ეს ევროპაში აპრობირებული მეთოდის საქართველოში დანერგვაა.

„სახელმწიფოს მიაჩნია, რომ აგრარული სექტორის განვითარება კოოპერაციის გზაზე გადის, რადგან იმ მოსახლეობის მიერ გაწეული შრომა გაცილებით მეტია და მეტ ხარჯს მოითხოვს, რომლებიც ერთ ჰექტრამდე ან ცოტა მეტ მიწას ფლობენ. ხოლო გაერთიანების შემთხვევაში გლეხებს საშუალება მიეცემათ, რომ ნაკლები შრომა გაწიონ, ხარჯი გადაანაწილონ და მეტი მოგება მიიღონ“, - განმარტავს გიორგი მიშელაძე.

ადიგენის მუნიციპალიტეტის გამგებლის მოვალეობის შემსრულებლის არსენ ბალახაშვილის თქმით, სასოფლო-სამეურნეო კოოპერატივების შექმნას ადგილობრივი მოსახლეობისთვის დიდი მნიშვნელობა აქვს. თუმცა ვარაუდობს, რომ პირველი ეტაპი შესაძლოა რთული იყოს.

„ადიგენის მუნიციპალიტეტში მოსახლეობის საკუთრებაში არსებული მიწის ფართობი ძირითადად ჰექტარი და 25 მეასედია. თუმცა, არის ისეთი საკრებულოებიც, სადაც 0,65 ან 0,70 ჰექტარი მიწა აქვთ. აღნიშნული მიწის ნაკვეთები კი ხუთ ან სამ ადგილზე აქვთ დანაწევრებული. ალბათ ეს ეტაპი შედარებით რთული იქნება, რადგან უნდა დააკომპლექტონ და თავი მოუყარონ. თუმცა, იდეა ძალიან კარგია და მოსახლეობამ კარგად უნდა გაიგოს, რომ აღნიშნული მიწის ფართობები გაამსხვილოს და გააერთიანოს“, - ამბობს არსენ ბალახაშვილი.

სასოფლო-სამეურნეო კოოპერატივების განვითარების სააგენტოს წარმომადგენლების თქმით, კოოპერატივებს გარკვეული საგადასახადო შეღავათებიც ექნებათ.

„უპრეცედენტო შემთხვევაა, როცა მეწარმე სუბიექტი გრანტის მიმღები იქნება. შესაბამისად, გრანტის სახით მიღებული მოგება თავისუფლდება გადასახადისგან“, - აღნიშნავს გიორგი მიშელაძე.

2014 წლიდან კოოპერატივების განვითარებისა და ჩამოყალიბების პროგრამას სამცხე-ჯავახეთის ორ მუნიციპალიტეტში, ნინოწმინდასა და ახალქალაქში საერთაშორისო არასამთავრობო ორგანიზაცია „მერსი ქორპსიც“ იწყებს.

„აღნიშნული პროგრამა შესაძლებელია, რომ განვითარდეს ახლადშემქნილ სააგენტოსთან თანამშრომლობით და იმედი გვაქვს, რომ წარმატებით განხორციელდება“, - ამბობს „მერსი ქორპსის“ პროგრამა „ალიანსების“პროგრამის კოორდინატორი სამცხე-ჯავახეთში ნინო კაპანაძე.

კოოპერატივების შექმნა, დაფუძნება და აქამდე შექმნილი კოოპერატივებისთვის სტატუსის მინიჭების მოთხოვნა უკვე შესაძლებელია. სასოფლო-სამეურნეო კოოპერატივების განვითარების სააგენტოს თავმჯდომარის თქმით, მთავარია მათ მიერ შედგენილი წესდება კანონის იმ მინიმალურ მოთხოვნებს აკმაყოფილებდეს, რომელიც „სასოფლო-სამეურნეო კოოპერატივის შესახებ“ კანონითაა განსაზღვრული. სტატუსის მინიჭება კი სავარაუდოდ დეკემბრის ბოლოს დაიწყება.

შეგახსენებთ, რომ საქართველოს კანონი „სასოფლო-სამეურნეო კოოპერატივის შესახებ“ პარლამენტმა 2013 წლის 12 ივლისს მიღო. კანონის საფუძველზე შეიქმნა საჯარო სამრთლის იურიდიული პირი - „სასოფლო-სამეურნეო კოოპერატივების განვითარების სააგენტო“, რომელიც სასოფლო-სამეურნეო კოოპერატივებისთვის სტატუსის მინიჭებას, შეწყვეტას, მონიტორინგსა და სახელმწიფო პროგრამების განხორციელებას უზრუნველყოფს.



[თამარ თოთაძე, ახალციხე]