ახალციხის ბიუჯეტი 668,476 ლარით გაიზარდა

144 ათასი ლარი დაემატა სოციალურ პაკეტს და ჯამში 477 ათასი ლარი შეადგინა. როგორც საკრებულოში გვიხსნიან, სოციალური პაკეტით გათვალისწინებულ პროგრამებს რამდენიმე მიმართულება დაემატა.

„100 პროცენტით დაფინანსდება ავღანეთის სამშვიდობო მისიის მონაწილეთა შვილების სწავლა საბავშვო ბაღებსა და სამუსიკო სკოლებში; ერთჯერად დახმარებებს მიიღებენ, ავღანეთის სამშვიდობო მისიაში, სამამულო ომსა და საქართველოს ტერიტორიული მთლიანობისთვის ბრძოლაში დაღუპულთა ოჯახები; ასევე ერთჯერადად დაეხმარებიან უსინათლოებს და ას წელს გადაცილებულ მოქალაქეებს. გაიზარდა პაკეტი მზრუნველობამოკლებულთა უფასო სასადილოზე“, - განმარტავს ახალციხის მუნიციპალიტეტის გამგეობის მთავარი სპეციალისტი სოციალურ საკითხებში იამზე მღებრიშვილი.

ცვლილებამდე ადგილობრივი ბიუჯეტი 8,672,719 ლარს შეადგენდა. როგორც საკრებულოში განმარტავენ, ცვლილებები იმითაა გამოწვეული, რომ მიმდინარე წელს იგეგმება სოფელ სვირში ახალი ამბულატორიის აშენება, ახალციხეში გამგეობის ყოფილი შენობის გარემონტება. თანხა გაითვალისწინეს საბავშვო ბაღებისთვის ავეჯის შესაძენადაც, ვინაიდან, ბაღებში კონტიგენტი გაიზარდა.

[თამარ თოთაძე, ახალციხე]