სამცხე-ჯავახეთის გუბერნატორს უკვე ყოფილი თანამშრომელი ზეწოლაში ადანაშაულებს

„გუბერნატორმა მითხრა, რომ განცხადება დამეწერა და სამსახურიდან წავსულიყავი, - განაცხადა „სამხრეთის კარიბჭესთან“ შუშანიანმა, რომელიც საგანგებო სიტუაციების მართვის სამსახურის უფროსად 4 წელია მუშაობს - დღეს დავწერე პირადი განცხადება და დავტოვე კანცელარიაში“.

კითხვაზე თუ რა გახდა ამის მიზეზი, გვპასუხობს, რომ არ იცის: „ეგ მეც მაინტერესებს. არ ვიცი რატომ გამათავისუფლეს სამსახურიდან“.

გუბერნიაში კი შუშანიანის განცხადება უკვირთ. სამხარეო ადმინისტრაციაში მასზე ზეწოლას კატეგორიულად უარყოფენ.

„გუბერნატორი ზეწოლას უარყოფს, მსგავს ფაქტს ადგილი არ ჰქონია. უკვირს რატომ თქვა ასეთი რამ შუშანიანმა“, - გვითხრა სამხარეო ადმინისტრაციაში საზოგადოებასთან ურიერთობის სპეციალისტმა ია გოგატიშვილმა.

გუბერნიაში ადმინისტრაციის სამსახურის უფროსის გიორგი მიქელაძის განცხადებით, შუშანიანი დროებით მოვალეობის შემსრულებელი იყო: „სავარაუდოდ მალე კონკურსი გამოცხადდება. ბუნებრივია, ეს შეეხება დროებით მოვალეობის შემსრულებლებსაც, შესაბამისად ისევე როგორც სხვებს კონკურსის გავლა მასაც მოუხდებოდა. ამიტომ მისი სამსახურიდან გათავისუფლება არავის დასჭირდებოდა“.

შეგახსენებთ, რომ აკაკი მაჭუტაძე სამცხე-ჯავახეთის გუბერნატორად 2013 წლის 13 დეკემბერს დაინიშნა. ოფიციალურად მოვალეობის შესრულებას კი 16 დეკემბრიდან შეუდგა. პირველად თანამშრომლებთან შეხვედრისას მაჭუტაძემ სათათბირო ოთახში განაცხადა, რომ სამსახურიდან არცერთი მათგანის გაშვებას არ აპირებდა: „რეგიონს დასაკარგი კვალიფიციური კადრები არ ჰყავს“.

[თამუნა უჩიძე, ახალციხე]