აბასთუმნის დედათა მონასტრის ქურდობის საქმე გახსნილია

შსს-ს სამცხე-ჯავახეთის სამხარეო მთავარი სამმართველოს ადიგენის რაიონული სამმართველოს აბასთუმნის განყოფილების თანამშრომლებმა, ჩატარებული სამძებრო-საგამოძიებო ღონისძიებების შედეგად, 1987 წელს დაბადებული ვლადიმერ ზ, 1975 წელს დაბადებული იური ო. და 1963 წელს დაბადებული სტეპან ა. ქურდობის ბრალდებით თბილისში დააკავეს.

გამოძიების შედეგად დადგინდა, რომ დაკავებულებმა 23 იანვარს, გამთენიისას, ადიგენის რაიონის დაბა აბასთუმანში მდებარე დედათა მონასტრიდან 2 ცალი ანტიკვარული „სამოვარი“ და სხვადასხვა სახის მოვერცხლილი და მოოქროვილი ჭურჭელი მოიპარეს, რომლებიც თბილისში, ერთ-ერთ სავაჭრო ობიექტში სარეალიზაციოდ ჩააბარეს.

სამართალდამცველებმა სამივე ბრალდებული მომხდარიდან რამდენიმე საათში დააკავეს, ხოლო ნაქურდალი ნივთები ნივთმტკიცებად ამოიღეს.

გამოძიება ქურდობის ფაქტზე მიმდინარეობს (საქართველოს სსკ-ის 177-ე მუხლის მე-2 ნაწილის „ა“ და „ბ“ ქვეპუნქტებით და მე-3 ნაწილის „ა“ ქვეპუნქტით).

შეგახსენებთ, რომ კურორტ აბასთუმანში წმინდა პანტელეიმონ მკურნალის დედათა მონასტერი რომანოვების სასახლეშია განთავსებული. 2008 წლის 12 მარტს მონასტერს ხანძარი გაუჩნდა და სასახლე, რომელიც გარედან მთლიანად ხის იყო, ნაწილობრივ დაიწვა. დამწვარი შენობის აღდგენა ვერ მოხერხდა და იმ ადგილას, ნახევრად დამწვარი ძველი შენობის გვერდით, ახალი შენობა აშენდა.

[sknews.ge]