სახალხო დამცველმა რეგიონულ წარმომადგენლობებს უფლება-მოვალეობები გაუზარდა

სახალხო დამცველის აპარატის სამცხე-ჯავახეთის წარმომადგენელი არმენ მარანგოზიანი.

უფლება-მოვალეობები რეგიონულ წარმომადგენლობებს საქართველოს სახალხო დამცველის სპეცილური რწმუნებით გაეზარდათ, რომელიც 2013 წლის 31 დეკემბერსაა გამოცემული.

მაგალითად, სახალხო დამცველის აპარატის სამცხე-ჯავახეთის წარმომადგენელს არმენ მარანგოზიანს შეუძლია დაუბრკოლებლად შევიდეს ცენტრალური ხელისუფლებისა და ადგილობრივი თვითმმართველობის ნებისმიერ ორგანოში, საწარმოში, ორგანიზაციასა და დაწესებულებაში, მათ შორის სამხედრო ქვედანაყოფში, პატიმრობისა და თავისუფლების აღკვეთის დაწესებულებებში, დაკავების და თავისუფლების შეზღუდვის სხვა ადგილებში, მოითხოვოს და მიიღოს შემოწმებისთვის აუცილებელი ყველა ცნობა, დოკუმენტი და სხვა მასალა.

აპარატის თანამშრომელს რეგიონის მასშტაბით შეუძლია „ნებისმიერ თანამდებობის პირს, მოხელეს, მასთან გათანაბრებულ პირს მოსთხოვოს და მიიღოს წერილობითი ახსნა-განმარტება გამოსაკვლევ საკითხებზე; სახელმწოფო ან/და არა სახელმწიფო დაწესებულებების მეშვეობით ჩაატაროს საექსპერტო გამოკვლევები ან/და მოამზადოს დასკვნები; მოიწვიოს სპეციალისტები ექსპერტები საექსპერტო ან/და საკონსულტაციო სამუშაოთა შესასრულებლად; გაეცნოს სისხლის სამართლის, სამოქალაქო და ადმინისტრაციულ საქმეებს, რომლებზე მიღებული გადაწყვეტილებებიც კანონიერ ძალაშია შესული“,- ნათქვამია რწმუნებაში.

აპარატის თანამშრომელს შეუძლია შეამოწმოს პატიმრობისა და თავისუფლების აღკვეთის დაწესებულებებში, დაკავებისა და თავისუფლების შეზღუდვის სხვა დაწესებულებებში, აგრეთვე ფსიქიატრიულ დაწესებულებებში, მოხუცთა თავშესაფრებსა და ბავშვთა სახლებში ადამიანის უფლებათა და თავისუფლებათა დაცვის მდგომარეობა; პირადად შეხვდეს და გაესაუბროს დაკავებულებს, პატიმრობაში მყოფთ და მსჯავრდებულებს; შეამოწმოს აღნიშნულ დაწესებულებებში მათი ყოფნის დამადასტურებებლი დოკუმენტაცია.

ამავე დაწესებულებებში მოთავსებულ პირთა ქცევის რეგურალური შემოწმების, ასევე წამებისა და სხვა სასტიკი, არაადამიანური ან დამამცირებელი მოპყრობისაგან ან სასჯელისაგან მათი დაცვის უზრუნველყოფის მიზნით საქართველოს სახალხო დამცველის სპეციალური რწმუნებით აღჭურვილი პირი: მოწმის გარეშე, პირადად ან თარჯიმნის მეშვეობით ხვდება და ესაუბრება დაკავებულებს, პატიმრობაში მყოფ ან სახვაგვარად თავისუფლებაშეზღუდულ პირებსა და მსჯავრდებულებს, ფსიქიატრიულ დაწესებულებებში, მოხუცთა თავშესაფრებსა და ბავშვთა სახლებში მოთავსებულ პირებს, აგრეთვე იმ პირებს, რომელთაც შეუძლიათ აღნიშნულ პირთა უფლებების დარღვევის შესახებ ინფრომაციის მიწოდება;
ასევე ამოწმებს აღნიშნულ დაწესებულებებში მოთავსებულ პირთა იქ ყოფნის დამადასტურებელ დოკუმენტაციას.

სახალხო დამცველია აპარატის სამცხე-ჯავახეთის წარმომადგენელი არმენ მარანგოზიანი ამბობს, რომ გაზრდილი უფლება-მოვალეობები მათ მუშაობას გაცილებით ეფექტურს გახდის.

[თინათინ ზაზაძე, ახალციხე]