აღნიშნულ ტენდენციას სახალხო დამცველი აპარატის საქმიანობის გააქტიურებასა და ცნობადობის ამაღლებას უკავშირებს.
როგორც სახალხო დამცველის აპარატში აცხადებენ, აპარატის საქმიანობის გაუმჯობესების მიზნით რამდენიმე სიახლე განხორციელდა: დაინერგა საქმისწარმოების ერთიანი ელექტრონული პროგრამა; დაიწყო კვალიფიციური იურიდიული კონსულტაციის მიწოდება და სამართლებრივი დოკუმენტაციის შედგენა, რაც მოიცავს ადგილობრივ და საერთაშორისო დონეზე ადამიანის უფლებების დაცვის მექანიზმებზე ამომწურავი ინფორმაციის მიწოდებას; მოხდა არქივის სისტემატიზიცია; განახლდა ვებ-გვერდი.
გარდა ამისა, შეიცვალა აპარატის სტრუქტურა, გაიზარდა აპარატში მომუშავეთა რიცხვი. ქალის, ბავშვისა და შშმ პირთა უფლებათა დაცვის ცენტრი 3 ცალკეულ სტრუქტურულ ერთეულად ჩამოყალიბდა: ბავშვის უფლებების ცენტრი, შშმ პირთა უფლებების ცენტრი და გენდერული თანასწორობის დეპარტამენტი.
„გაფართოვდა პრევენციის ეროვნულ მექანიზმი. კონკურსის საფუძველზე მონიტორინგში მონაწილე 40 დარგობრივი ექსპერტი შეირჩა. ამასთან, განახლდა დახურული დაწესებულებების მონიტორინგის მეთოდოლოგია. მიმდინარე წელს განხორციელდა 290 ვიზიტი - სასჯელაღსრულების დაწესებულებებში; 88 ვიზიტი პოლიციის განყოფილებებში და იზოლატორებში; 4 ვიზიტი სამხედრო ჰაუპტვახტში; 6 ვიზიტი ფსიქიატრიულ დაწესებულებებში“, - ნათქვამია ანგარიშში.
სახალხო დამცველის ოფისის ანგარიშში საუბარია საკანონმდებლო წინადადებებსა და რეკომნდაციებზეც. ანგარიშის თანახმად, სახალხო დამცველმა რამდენიმე საკანონმდებლო წინადადებითა და განცხადებით მიმართა საქართველოს მთავრობას და საქართველოს პარლამენტს. აგრეთვე წარადგინა სასამართლო მეგობრის (Amicus Curiae) მოსაზრება და საკონსტიტუციო სარჩელები.
ადამიანის უფლებების დარღვევის ფაქტებთან დაკავშირებით სახალხო დამცველმა სხვადასხვა უწყებებს 111 რეკომენდაციით მიმართა. გარდა ამისა, მონიტორინგი განახორციელა 138 სასამართლო პროცესის მიმდინარეობაზე.
ანგარიშის მიხედვით, სახალხო დამცველის აპარატთან არსებულ ტოლერანტობის ცენტრი მუდმივ კოორდინირებას და მხარდაჭერას უწევს რელიგიური და ეროვნული უმცირესობების საბჭოების საქმიანობას.
ანგარიშში საგანმანათლებლო მიზნებისათვის განხორციელებულ აქტივობებზეცაა საუბარი. მათ შორისაა: სოციალური რეკლამა, რომელიც გადის საზოგადოებრივ მაუწყებლის ტელე და რადიო ეთერში; კონკურსი - „მე ომბუდსმენი 2013“; ვიქტორინა -„ეთნოსები და რელიგიები საქართველოში 2013“; მედია კონკურსი „ტოლერანტობა და მრავალფეროვნება 2013“;
ასევე, ტრენინგები, სემინარები, დისკუსიები, მრგვალი მაგიდები: შეხვედრები მოსწავლე-ახალგაზრდობასთან, სტუდენტებთან, რექტორებთან, პედაგოგებთან ადამიანის უფლებებისა და თავისუფლებების დაცვის მდგომარეობის შესახებ.
ანგარიშში ხაზგასმულია საერთაშორისო ორგანიზაციებთან და პარტნიორებთან თანამშრომლობის გაღრმავება.
„შედგა ომბუდსმენთა მეორე სამიტი აღმოსავლეთ პარტნიორობისა და ევროპის კავშირის ფარგლებში; ნატო-საქართველოს კომისიის სხდომა პოლიტიკური და პარტნიორობის კომიტეტის დონეზე; აზიის ომბუდსმენთა ასოციაციის მე-13 კონფერენცია; ადამიანის უფლებათა ეროვნული ინსტიტუტების სტრატეგიული შეხვედრა.
განსაკუთრებით აღსანიშნავია ის ფაქტი, რომ საქართველოს სახალხო დამცველის ინსტიტუტს ადამიანის უფლებათა დაცვისა და ხელშეწყობის ეროვნული ინსტიტუტების საერთაშორისო საკოორდინაციო კომიტეტის ფარგლებში „A“ სტატუსი მიენიჭა და 3 წლის ვადით იქნა არჩეული ევროპის ადამიანის უფლებათა დაცვის ეროვნული ინსტიტუტების ჯგუფის საკოორდინაციო კომიტეტის წევრად.
შეიქმნა საქართველოს სახალხო დამცველის საერთაშორისო მრჩეველთა საბჭო - 4 მოწვეული საერთაშორისო ექსპერტი იკრიბება წელიწადში ორჯერ და კონსულტაციას უწევს საქართველოს სახალხო დამცველს ადამიანის უფლებადარღვევებზე ეფექტურ რეაგირების მექანიზმებზე“, -ნათქვამია ანგარიშში, რომელიც სახალხო დამცველმა დღეს, 12 დეკემბერს წარადგინა.
[ნინო ნარიმანიშვილი, ახალციხე]
FM97.5 / LIVE
