‘ლელომ’ და ‘ტრიბუნამ’ ადგილობრივებს პროგრამული პრიორიტეტები გააცნეს

2020 წლის წინასაარჩევნო პროგრამების წარდგენა და დისკუსია დღეს, 29 ოქტომბერს ახალციხის დემოკრატიული ჩართულობის ცენტრში მოეწყო.
იგი აღმოსავლეთ ევროპის ცენტრის მრავალპარტიული დემოკრატიისთვის „ღია საზოგადოების ფონდის“ დაფინანსებითა და „დემოკრატიული ჩართულობის ცენტრების ქსელთან“ თანამშრომლობით გაიმართა.

შეხვედრა რამდენიმე ნაწილისგან შედგებოდა. პირველ ნაწილში აუდიტორიამ იმ კვლევის შესახებ მოისმინა, რომელიც პოლიტიკურმა ექსპერტმა და საქართველოს საზოგადოებრივ საქმეთა ინსტიტუტის „ჯიპას“ სამართლისა და პოლიტიკის სკოლის დეკანმა ბაკურ კვაშილავამ, პოლიტიკური პარტიების პროგრამების შესახებ მოამზადა.

პოლიტიკური პროგრამების განხილვასა და შეფასებისას ექსპერტმა აღნიშნა, რომ პარტიების პროგრამების ნაწილი ერთმანეთის თანხვედრაშია. გეგმებში იკვეთება რამდენიმე მთავარი მიმართულება, რაზეც აწყობილია მათი პროგრამები. ასეთებია: ეკონომიკა, უცხოური ინვესტიციები, სოფლის მეურნეობა, ტურიზმი, გარემოს დაცვა და სხვა.

„თითოეული პარტია გვეუბნება, რომ მთლიან შიდა პროდუქტს გაზრდის დაახლოებით 80%-ით, სხვადასხვა გათვლით კი საქართველოს მთლიანი შიდა პროდუქტი ამ დროისათვის არის ალბათ 50 მილიარდი“, - ამბობს კვაშილავა.

მისივე განმარტებით, კონსტიტუცია, საარჩევნო სისტემა და სასამართლო ასევე ძირითად საკითხებს წარმოადგენს:“ რამდენიმე პარტია მოითხოვს პრეზიდენტის პირდაპირ არჩევნებს. საარჩევნო სისტემაზე ყველა კმაყოფილია. სასამართლოზე ყველა პარტია ამბობს, რომ არის საშინელი მდგომარეობა და უნდა შეიცვალოს. „ოცნება“ ამბობს, რომ კი, ბევრი საქმეები დაგროვდა და კომპეტენცია მაინც და მაინც კარგი არ არის მოსამართლეების, მაგრამ არ აღიარებს იმას, რომ სასამართლო არის ზეგავლენის ქვეშ“.

კიდევ ერთი საკითხი, რაზეც პარტიების უმრავლესობა თანხმდება ესაა საგარეო პოლიტიკა: „საგარეო პოლიტიკაზე ყველა ამბობს, რომ ევროკავშირში გვინდა, ყველა ამბობს, რომ კავკასიაში გვინდა მშვიდობა, ყველა მეზობელთან კარგი ურთიერთობა, მაგრამ რა ვქნათ რომ რუსეთი ასეთია, თუმცა ერთი პარტია, ბურჯანაძის პარტია ამბობს, რომ აქ პრობლემა არ არის. პარტიების აბსოლუტური უმრავლესობა მიიჩნევს, რომ „ნატოში“ გაწევრიანება მნიშვნელოვანია და თუ ეს არ გამოვიდა, ამერიკასთან უნდა გვქონდეს ურთიერთთანამშრომლობის აქტი გაფორმებული“.

ექსპერტის შეფასებების შემდეგ, შეხვედის მეორე ნაწილი „ლელოსა“ და „ტრიბუნას კანდიდატების საარჩევნო პროგრამებს დაეთმო.

„ტრიბუნას“ მაჟორიტარმა კანდიდატმა გელა კვარაცხელიამ აღნიშნა, რომ მათი პარტიული პრიორიტეტები საბანკო სექტორში არსებული პრობლემების მოგვარებაა, ხოლო „ლელოს“ ახალციხის შტაბის ხელმძღვანელმა ჯუმბერ ინასარიძემ ყურადღება გაამახვილა პროგრამული პრიორიტეტებიდან რამდენიმეზე, მათ შორის: სოფლის მეურნეობა, ახალგაზრდები.

შეხვედრის მესამე ნაწილი დისკუსიას დაეთმო. მედიისა და არასამთავრობო ორგანიზაციების წარმომადგენლებმა კითხვები დაუსვეს ორი პარტიის წარმომადგენლებს.

[თაკო ფეიქრიშვილი]