ახალციხეში მეოთხე სკოლის მასწავლებელს კორონავირუსი დაუდასტურდა

როგორც სკოლის დირექტორი განმარტავს, 70 წლამდე მასწავლებლის დაინფიცირების წყარო თბილისია.

"თბილისის ერთ-ერთ საავადმყოფოში გაუკეთეს მის ოჯახის წევრს ოპერაცია, იქ იყო ჩასული და დაინფიცირდა. ჩვენთან დღენახევარი იყო სკოლაში. მოძიებულია კონტაქტები და მასწავლებლების და მოსწავლეების ნაწილი თვითიზოლაციაში არიან", - ამბობს სკოლის დირექტორი.

მისი თქმით, ინიფიცირებულ პედაგოგთან ახლო კავშირი ორ მასწავლებელს და ოთხ მოსწავლეს ჰქონდა.

"ჯანდაცვიდან იყვნენ, ყველას მიეცათ რეკომენდაცია, დღევანდელი მონაცემებით სწავლის შეწყვეტის რეკომენდაცია არ მოსულა, ველოდებით", - ამბობს სკოლის დირექტორი.

გუშინ, 17 ოქტომბერს კორონავირუსი დაუფიქსირდა ქალაქ ვალეში მდებარე საბავშვო ბაღის ერთ-ერთ პედაგოგსაც, რის გამოც დაწესებულებაში სწავლა დროებით შეწყვეტილია. თვითიზოლაციაში გადავიდა ახალციხის N1 საბავშვო ბაღის ერთი ჯგუფი, ამ შემთხვევაში COVID-19 ერთ-ერთი აღსაზრდელის მშობელს აღმოაჩნდა.

დღეს, 18 ოქტომბერს, ახალციხეში კორონავირუსის ცხრა ახალი შემთხვევაა. სულ მუნიციპალიტეტში ინფიცირების 28 ფაქტია დადასტურებული, რაც შეეხება რეგიონს მთლიანობაში მათი რიცხვი 92-მდე გაიზარდა. აქედან გამოჯანმრთელდა 30 პაციენტი, ერთი კი გარდაიცვალა.


[sknews.ge]