ახალციხის მეხუთე სკოლაში COVID-19 მოსწავლეებსა და მანდატურს დაუდასტურდათ

სკოლის დირექტორის განცხადებით, მოსწავლეები, რომლებსაც კორონავირუსი აქვთ, ბოლო პერიოდში სკოლაში არ დადიოდნენ, შესაბამისად სასწავლო პროცესის შეჩერების აუცილებლობა არ არის.

„მოსწავლეებს, რომლებსაც კორონავირუსი აღმოაჩნდათ, 13 ოქტომბრის შემდეგ სკოლაში არ ყოფილან. 14 ოქტომბერს დასვენების დღე იყო, შემდეგ სოფელში წავიდნენ, მალევე მათი ოჯახის წევრს დაუდასტურდა ვირუსი და ბავშვები აღარ მოსულან სკოლაში. შესაბამისად ეს ფაქტი დანარჩენი მოსწავლეებისთვის საფრთხეს არ წამოადგენს“, – განაცხადა „სამხრეთის კარიბჭესთან“ სკოლის დირექტორმა ინგა ვარდიძემ.

რაც შეეხება მანდატურს, ის ბოლოს სკოლაში პარასკევს, 16 ოქტომბერს იმყოფებოდა.

„მანდატურს გასულ შაბათს ჰქონდა კონტაქტი, სავარუდო კოვიდინფიცირებულთან. ამის შემდეგ ის არ გამოცხადებულა სკოლაში, ამ პერიოდში შემხებლობა არ ჰქონია სკოლასთან, და დღეს დაუდასტურდა კოვიდ ინფექცია“ - განაცხადეს მანდატურის სამსახურში.

მათივე განმარტებით, სამცხე–ჯავახეთში მანდატურის დაინფიცირების ეს პირველი შემთხვევაა.

22 ოქტომბრის მონაცემებით, სამცხე–ჯავახეთში კორონავირუსით ინფიცირების შემთხვევები 174–მდე გაიზარდა.

[მარიამ ბარძიმაძე]