‘ოცნებამ’ სამცხე–ჯავახეთის კანდიდატების წარდგენა ნინოწმინდაში დაასრულა

მაჟორიტარი დეპუტატობის კანდიდატების ოფიციალური წარდგენა „ქართულმა ოცნებამ“ ნინოწმინდაში დღეს, 13 ოქტომბერს დაასრულა. სამველ მანუკიანმა საკუთარ თანაგუნდელებს ნდობისთვის მადლობა გადაუხადა და სიტყვით ამომრჩეველსაც მიმართა.

მანუკიანი ოფიციალურად კახი კალაძემ წარადგინა. შეხვედრაზე სიტყვით პრემიერ–მინისტრი, გიორგი გახარია და ირაკლი კობახიძეც გამოვიდნენ, რომლებმაც მუნიციპალიტეტში დაგეგმილ და განხორციელებულ პროექტებზე ისაუბრეს.

„დიდი პატივია ჩემთვის დღეს, თქვენთან ერთად აქ ყოფნა და ჩვენი ქვეყნის, საქართველოს და ნინოწმინდის ხვალინდელ დღეზე, გეგმებსა და მომავალზე საუბარი. საერთოდ, ჩვენ დიდი ხანია შევთანხმდით, რომ ჩვენი ეთნიკური მრავალფეროვნება ჩვენი ქვეყნის, საქართველოს სიძლიერეა, რადგან ჩვენ ყველამ ერთად მშვიდად, მშვიდობიანად უნდა ვიშრომოთ, ვიზრუნოთ ჩვენი ქვეყნის, ჩვენი სამშობლოს განვითარებისთვის. ამას ერთად ვაკეთებთ და შემდგომი 4 წელიც ერთად უნდა გავაკეთოთ. შემდგომი 4 წლის განმავლობაში ჩვენ კონკრეტული გეგმა გვაქვს, კონკრეტულად ვიცით, სად, რომელი პროექტი რა დროს უნდა დავიწყოთ და როგორ უნდა დავამთავროთ“ – აღნიშნა გიორგი გახარიამ.

"ქართულმა ოცნებამ" მაჟორიტარი დეპუტატობის კანდიდატების ოფიციალურად წარდგენა სამცხე–ჯავახეთში გუშინ, 12 ოქტომბერს დაიწყო.


[რობი ზარიძე]