სასამართლო პროცესზე მოსარჩელე გარდაიცვალა

მოსამართლე გია ბერაია საქმეს შპს ”რუსთავ ჰესისათვის” მიყენებული ზარალის ანაზღაურების შესახებ იხილავდა.

მოსარჩელე მალხაზ სანდროშვილი და მოპასუხე ანდრიას გიუნტერ მელცერი, ორივე შპს ”რუსთავ ჰესის” დირექტორია. სანდროშვილი მელცერისთვის საწარმოსთვის მიყენებული ზარალის ანაზღაურების დაკისრებას ითხოვდა.

”სასამართლო საქმის არსებით განხილვაზე იყო, თუმცა ჯერ განხილვამდე არ იყო პროცესი მისული, არც მოწმეები იყვნენ დაკითხული და არც მხარეებს ჰქონდათ ახსნა-განმარტება წარმოდგენილი ეს შემთხვევა რომ მოხდა”, - ამბობს ახალციხის რაიონული სასამართლოს მენეჯერის მოვალეობის შემსრულებელი ნინო ჩიგოგა.

მისივე თქმით, სასამართლო აბსოლიტურად მშვიდ ვითარებაში მიმდინარეობდა: ”არც კონფლიქტი იყო და არც კითხვა-პასუხის რეჟიმზე იყვნენ გადასულები, სანდროშვილმა საუბარი დაასრულა, დაჯდა, მაგიდაზე თავი დადო და რამდენიმე წამში გაითიშა. ეს ყველაფერი დაახლოებით 15:15 საათზე მოხდა”.

მოსამართლემ სხდომა შეწყვიტა, სასამართლოს მანდატურის სამსახურმა სასწრაფო დახმარების სამსახურს დაურეკა.

”სასწრაფო მალევე მოვიდა, თუმცა, სანდროშვილი ამ დროისთვის უკვე გარდაცვლილი იყო”, - გვითხრა ჩიგოგამ.

[თამუნა უჩიძე, ახალციხე]