უდელი ქალის ინფიცირების წყარო ისევ უცნობია

როგორც სამცხე-ჯავახეთის სამხარეო ადმინისტრაციაში აცხადებენ, უდელი ქალი, რომელიც სასწრაფო-სამედიცინო სამსახურის ექთანია, თავს კარგად გრძნობს. მას სიმპტომები არ აქვს: „ეს ქალი იყო უსიმპტომო. გეგმური ტესტირება ჩაუტარდა, როგორც მედპერსონალს უტარდება ხოლმე, ორ კვირაში ერთხელ და აქედან დაუდასტურდა“, - ამბობს სამცხე–ჯავახეთში სახელმწიფო რწმუნებულის აპარატის ხელმძღვანელი გიორგი მიქელაძე.

იგი არ ადასტურებს ადგილობრივების მიერ გავრცელებულ ვერსიას, რომლის მიხედვითაც, ექთანი გამოძახებაზე ადიგენის სოფელ ჭეჭლაში იმყოფებოდა, სადაც ინფიცირებულ პირებთან ჰქონდა შეხება.

„ამ ეტაპზე მიმდინარეობს მისი დაინფიცირების წყაროს მოკვლევა. არის რამდენიმე ვერსია, ზოგი ადგილობრივების ნათქვამი, ზოგი თვითონ მისი ნათქვამი, ზოგი სხვისი, დამუშავების პროცესშია, ასე მარტივად ვერ ხდება ხოლმე მაგისი დადგენა“.

გამოვლენილია ინფიცირებულთან კონტაქტში მყოფი 20 პირი, მიქელაძის თქმით, ყველა მათგანი გაიტესტა და ყველა თვითიზოლაციაშია.

გუშინ, 23 სექტემბერს სამცხე-ჯავახეთის მასშტაბით სულ 343 ადამიანის ტესტი აიღეს. აქედან:

ახალციხეში - 134;
ადიგენი - 124;
ბორჯომი - 1;
ასპინძა - 16;
ახალქალაქი - 62;

„არის ასევე სხვადასხვა უწყების მიერ აღებული ტესტები. იღებენ კლინიკებიც, ჯანდაცვის ცენტრები, ანუ მაგალითად ადიგენელი ადამიანი შეიძლება ჩამოვიდეს და ახალციხეში ჩაიტაროს ტესტირება. მთლიანად რეგიონის მასშტაბით, გაკეთდა 343 ტესტი. 16-24 სექტემბარმდე, ერთი კვირის განმავლობაში კი 1 805 ტესტი“, - ამბობს გიორგი მიქელაძე.

რაც შეეხება თვითიზოლაციაში მყოფ პირებს, ამ ეტაპზე თვითიზოლაციაში არიან:

ადიგენში - 39 ადამიანი;
ახალციხეში - 37 ადამიანი;
ახალქალაქში 2;
ბორჯომში - 3;
ნინოწმნიდა 11;

მთლიანობაში თვითიზოლაციაში მყოფი ადამიანიანების რიცხვი 92-ია.

[თაკო ფეიქრიშვილი]